شەرزات سوتىندا ايىپتالۋشىلار مەن جابىرلەنۋشىلەردى بەتتەستىرۋ ءساتى جاريالاندى

تالدىقورعان. KAZINFORM - شەرزات پولاتتىڭ ولىمىنە قاتىستى قىلمىستىق ءىس بويىنشا كەزەكتى سوت وتىرىسىندا ايىپتالۋشى جانە جابىرلەنۋشى تاراپ اراسىنداعى بەتتەستىرۋ بەينەجازباسى ۇسىنىلدى. تىڭدالىم بارىسىندا ايعاقتار مەن بەينەماتەريالداردا سايكەسسىزدىكتەر بايقالدى.

الدىمەن سوتقا شىڭعىس بەلعوجايەۆتىڭ وقيعا كەزىندە مارقۇم شەرزاتتى قالاي ۇرعانى تۋرالى ايتقان بەينەجازباسى كورسەتىلدى.

بەينەتاسپادا ول نۇرقاناتقا قول كوتەرمەگەنىن مالىمدەيدى.

- مەن شاتاسىپ قالدىم، مىلتىق اتقان بالانى ۇردىم دەپ ويلادىم، سويتسەم شەرزاتتى ۇرىپ جىبەرىپپىن. ماعان دەيىن الگى بالاعا پىشاق سۇعىلىپ قويعان ەكەن. مەن شەرزاتتى جابۋلى پىشاقتىڭ سابىمەن ۇردىم، - دەيدى سوتتالۋشى شىڭعىس بەلعوجايەۆ بەينەجازبادا.

كەلەسى بەينەماتەريالدا ازامات توقتاۋبايەۆ تەرگەۋ بارىسىندا جالعان اقپارات تاراتىلعانىن جانە وزىنە شىڭعىس بەلعوجايەۆ تاراپىنان قىسىم كورسەتىلگەنىن ايتقان.

سونداي-اق، سوتتا مارقۇمنىڭ اناسى ازامات توقتاۋبايەۆتىڭ قولىندا پىشاق بولعانىن كورگەنىن جانە ونىڭ شەرزات جەردە جاتقاندا ۇرىپ جاتقانىن بايقاعانىن جەتكىزدى.

الايدا ازامات توقتاۋبايەۆ وقيعا ورنىندا تۇسىرىلگەن بەينەجازبادا ءوزىنىڭ سول ساتتە بولماعانى انىق كورىنەتىنىن ايتىپ، سۋديادان بۇل دەرەكتى نازارعا الۋدى سۇرادى.

سونىمەن قاتار دارحان اسكەنتايدىڭ تەرگەۋ كەزىندەگى بەينەجازباسى كورسەتىلدى. وندا ول بالالار كەلگەننەن كەيىن جانجال باستالىپ كەتكەنىن، ەشكىمگە توبەلەسۋگە نەمەسە كۇش قولدانۋعا بۇيرىق بەرمەگەنىن ايتقان.

ايتا كەتەيىك، بۇگىنگى سوتتا قارجاۋباي نۇرىموۆتىڭ قولىندا قانداي پىشاق بولعانى جايلى جازعانبىز.

وسىعان دەيىن ابزال شىناسىل سوتتالۋشىلاردىڭ بىرەۋى شەرزاتقا پىشاق سالعانىن مالىمدەگەن ەدى.

شەرزات ىسىندەگى باستى ايىپتالۋشى وسىعان دەيىنگى سوزىنەن باس تارتتى.

ەسكە سالا كەتەيىك، شەرزات پولاتتىڭ ولىمىنە قاتىستى سوتتا تاعى ءبىر سوتتالۋشى ايىپتاۋ اكتىسىمەن كەلىسپەيتىنىن ايتقان.