شەرزات سوتى: ايىپتالۋشىنىڭ ادۆوكاتى ءىستى پروكۋرورعا قايتارۋدى سۇرادى
تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.
سوت وتىرىسى بارىسىندا نۇربول توقتاۋبايەۆ پەن ازامات توقتاۋبايەۆتىڭ ادۆوكاتى ءىستى پروكۋرورعا قايتارۋدى سۇرادى.
- مەنىڭ قورعاۋىمداعى نۇربول توقتاۋبايەۆ پەن ازامات توقتاۋبايەۆقا قاتىستى قىلمىستىق ءىس قۇجاتتارىندا ولاردى كۇدىكتى دەپ تانۋ تۋرالى قاۋلى مۇلدەم جوق. بۇل قىلمىستىق-پروتسەستىك كودەكستىڭ 64-بابىنا سايكەس، كۇدىكتى رەتىندە تانۋ تۋرالى قاۋلى شىعارىپ، ول پروكۋرورمەن كەلىسۋى قاجەت جانە قىلمىستىق-پروتسەستىك كودەكستىڭ 202-بابىنا سايكەس ونى كۇدىكتى دەپ تانۋ قاۋلى شىعارىلعان ساتتەن باستاپ ەسەپتەلىنەدى. الايدا بۇل قىلمىستىق ءىس ماتەريالدارىندا كۇدىكتى رەتىندە تانۋ تۋرالى قاۋلى بولماعاندىقتان، ونىڭ پروتسەسسۋالدىق مارتەبەسى انىقتالماعان. بۇل كۇدىكتىگە قاتىستى قىلمىستىق قۋدالاۋدىڭ زاڭدى بەلگىلەنگەن ءتارتىبى ساقتالماي باستالعانىن كورسەتەدى. ەگەر كۇدىكتى رەتىندە رەسمي تانىلماي تۇرىپ، جاۋاپ الىنعان بولسا، بۇل ارەكەتتەر زاڭسىز دەپ ەسەپتەلەدى. سوندىقتان ءىس قوسىمشا تەرگەپ-تەكسەرۋ ءۇشىن جانە زاڭبۇزۋشىلىقتاردى جويۋ ءۇشىن پروكۋرورعا قايتارۋدى سۇرايمىن، - دەدى قورعاۋشى.
بۇل ءوتىنىشتى سوتتالۋشىلاردىڭ ادۆوكاتتارى قولداسا، مەملەكەتتىك ايىپتاۋشىلار مەن جابىرلەنۋشىلەردىڭ قورعاۋشىلارى قاناعاتتاندىرۋعا قارسى بولدى.
سۋديا ەرجان جانۇزاقوۆ ەكى تاراپتىڭ پىكىرىن تىڭداعان سوڭ، بۇل ءوتىنىشتى قاناعاتتاندىرماۋ تۋرالى شەشىم شىعاردى.
- توقتاۋبايەۆ ازامات جانە توقتاۋبايەۆ نۇربول، سونىمەن قاتار قالياحمەت ق ر قىلمىستىق كودەكسىنىڭ 131-بابىنا سايكەس، ۇستالعان ادامدار بولعاندىقتان، ولارعا قاتىستى زاڭ بولەك قاۋلى شىعارۋدى تالاپ ەتپەيدى. سوندىقتان بۇل سوتقا دەيىنگى تەرگەپ-تەكسەرۋ ورگانىنىڭ ءىس-ارەكەتتەرى زاڭدى دەپ تانىلادى، - دەدى سوت.
ەسكە سالايىق، سۋديا بلوگەرلەر مەن الەۋمەتتىك جەلى قولدانۋشىلارىنا ەسكەرتۋ جاسادى.
وتكەن سوت وتىرىسىندا ايىپتالۋشى دارحان اسكەنتايدان جاۋاپ الىندى.
سوت بارىسىندا سوتتالۋشىلاردىڭ ادۆوكاتتارى پروكۋروردى اۋىستىرۋدى ءوتىندى. ءبىراق سۋديا پروكۋروردى اۋىستىرۋدان باس تارتتى.
سونىمەن قاتار سوتتا دۇكەن كامەراسىنا تۇسكەن وقيعانىڭ تولىق بەينەجازباسى كورسەتىلدى.
العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.
بىلتىر 4-قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.
