شەرزات قازا تاپقان جەردەن ءۇش پىشاق پەن مىلتىق تاركىلەندى

قونايەۆ. KAZINFORM - تالعارداعى قايعىلى جاعداي بولعان جەردەن ءۇش پىشاق پەن مىلتىق تاركىلەندى.

بۇل تۋرالى تۋرالى ءى ءى م تەرگەۋ دەپارتامەنتى باستىعىنىڭ ورىنباسارى سامات ايسوۆ ايتتى.

«قازىرگى تاڭدا ءۇش پىشاق تاركىلەندى. سونداي-اق، ءبىر مىلتىق بار. دەپارتامەنت ونى ساراپتامادان وتكىزىپ جاتىر. ونىڭ كىمگە تيەسىلى ەكەنىن ازىرگە ايتا المايمىن»، - دەيدى ول.

بۇعان دەيىن ىشكى ىستەر مينيسترلىگىنىڭ وكىلدەرى تالعارداعى 16 جاستاعى شەرزات بولات قازا تاپقان جەردە كامەراعا ءتۇسىپ قالعان ۆيدەونى كورسەتتى.

ال الماتى وبلىسىنىڭ پروكۋرورى بەرىك اداموۆ قىلمىستىق ءىس بويىنشا جۇرگىزىلىپ جاتقان تەرگەۋ ساتىسىندا ەشقانداي زاڭبۇزۋشىلىق انىقتالماعانىن ايتتى.

سونداي-اق، ورتەنگەن شەرزاتتىڭ اتا-اناسى تۇرعان ءۇيدىڭ سىرتىنان رەزەڭكە قولعاپ پەن كانيستر تابىلعانى تۋرالى ايتىلدى.

ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ شەرزات بولاتتىڭ ولىمىنە جانە بۇزاقىلىققا قاتىستى 10 كۇدىكتى ۇستالعانىن مالىمدەدى.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.

اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە حابارلادى.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى جاس ءوسپىرىمنىڭ ولىمىنە قاتىستى ءىستى جەكە باقىلاۋىنا الدى.

سونداي-اق، قۇقىق قورعاۋشى ايتبەك امانگەلدى قازا تاپقان ءجاسوسپىرىمنىڭ وتباسىنا ادۆوكاتتار تاۋىپ بەردى.

الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك شالقاروۆ بەينەباقىلاۋ كامەرالارىنان الىنعان جازبالار زەرتتەلىپ جاتقانىن جەتكىزدى.

12-قازان كۇنى تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

سونداي-اق، باس پروكۋراتۋرا قىلمىستى اشۋ ءۇشىن ۆەدومستۆوارالىق جەدەل-تەرگەۋ توبى قۇرىلعانىن مالىمدەدى.

ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ مارقۇم شەرزات بولاتتىڭ ءۇيىن ورتەۋ وقيعاسىن تەرگەۋ توبىمەن تالعارعا باردى.

كەيىن ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ءورت قىلمىسى بويىنشا ايعاقتار الىنىپ، ءتيىستى ساراپتامالار جۇرگىزىلىپ جاتقانىن حابارلادى.

قوعامدىق ءتارتىپتى قاداعالاۋ ءۇشىن ۇلتتىق ۇلان اسكەرى جۇمىلدىرىلدى.