شەرزات ءىسى سوتقا قاشان جولدانادى

استانا. KAZINFORM - ق ر باس پروكۋرورىنىڭ ورىنباسارى اسەت شىنداليەۆ شەرزات پولاتتىڭ ولىمىنە قاتىستى ءىستى سوتقا جولداۋ تارتىبىنە تۇسىنىك بەردى.

судья
فوتو: مۋحتور حولدوربەكوۆ / Kazinform

ونىڭ ايتۋىنشا، تەرگەۋ اياقتالىپ، ءىس زەردەلەۋ جانە ايىپتاۋ اكتىسىن جاساۋ ءۇشىن پروكۋراتۋراعا جولداندى. قازىر الماتى وبلىسىنىڭ پروكۋراتۋراسى جۇرگىزىلگەن تەرگەۋ امالدارىنىڭ زاڭدىلىعىن تەكسەرىپ جاتىر. ونىڭ قورىتىندىسى بويىنشا ءىستى سوتقا جىبەرۋ تۋرالى شەشىم قابىلدانادى.

- ازىرگە، سوتقا جولداناتىن ناقتى كۇنىن اتاي المايمىن. ويتكەنى زاڭ بويىنشا مۇنداي شەشىمدەر ادەتتە 10 كۇن ىشىندە قابىلدانادى. ءبىراق ىستەر كۇردەلى بولسا، پروكۋروردىڭ مۇنداي شەشىمدى ءبىر اي ىشىندە قابىلداۋعا مۇمكىندىگى بار، - دەدى باس پروكۋروردىڭ ورىنباسارى سەناتتا تىلشىلەر سۇراعىنا جاۋاپ بەرە وتىرىپ.

سونىمەن قاتار ول كۇدىكتىلەردىڭ سانى وزگەرىسسىز قالعانىن ناقتىلادى، وسىعان دەيىن جاريالانعان 11 ادام بار.

ەسكە سالايىق، بىلتىر 4-قازان كۇنى توبەلەستەن 16 جاسار جاس ءوسپىرىم قايتىس بولعانىن جازعانبىز.

15-قازان كۇنى تالعار قالاسىنىڭ اكىمى باحىت قۋاتبەك ۇلى كۇرىشبەكوۆ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلدى. ارتىنشا، تالعار اۋدانى اكىمى اپپاراتىنىڭ باسشىسى اسلان قاسىمبايەۆ قىزمەتىنەن قۋىلدى.

كەيىن ازات اۋىلىندا جەرلەۋ ءراسىمىن وتكىزۋ كەزىندە قوعامدىق ءتارتىپتى بۇزعانى ءۇشىن شەرزات پولاتتىڭ اكەسى قارجاۋباي ۇستالعانىن جازعانبىز.

بيىل اقپان ايىنىڭ اياعىنلا شەرزات ىسىنە قاتىستى قىلمىستى تەرگەۋ اياقتالعانى جاريالاندى.

اۆتور

رۋسلان عابباسوۆ

سوڭعى جاڭالىقتار