شري-لانكادا 16 جاستاعى قازاقستاندىق سەرفينگپەن ايلانىسىپ ءجۇرىپ قايتىس بولدى
استانا. KAZINFORM - شري-لانكا اۋرۋحاناسىندا كوز جۇمعان 16 جاستاعى قازاقستاندىقتىڭ دەنەسىن ەلگە اكەلۋ ءۇشىن اۋە كومپانياسىمەن كەلىسسوز ءجۇرىپ جاتىر. سىرتقى ىستەر مينيسترلىگىنىڭ رەسمي وكىلى ايبەك سمادياروۆ كەزەكتى بريفينگىدە وسىنداي مالىمەت ايتتى.
«10- ناۋرىزدا ءبىزدىڭ ءۇندىستانداعى ەلشىلىككە قازاقستان ازاماتتارى حابارلاستى. ولاردىڭ كامەلەتكە تولماعان 16 جاستاعى ۇلى شري-لانكانىڭ ءبىر اۋرۋحاناسىندا جاتىر دەگەن اقپارات كەلىپ ءتۇستى. ول اقپاراتتى تەكسەرگەننەن كەيىن 5- ناۋرىزدا جاس ءوسپىرىم سەرفينگپەن اينالىسىپ ءجۇرىپ، سۋعا باتىپ كەتكەنى ءمالىم بولدى. جانساقتاۋ بولىمىندە 10- ناۋرىزعا دەيىن 5 كۇن جاتتى. سول 5 كۇننىڭ ىشىندە، ارينە، دارىگەرلەر قولىنان كەلگەننىڭ ءبارىن جاسادى. ءبىراق، وكىنىشكە قاراي، جاڭاعى بالا قايتىس بولدى»، - دەدى ول.
ايبەك سمادياروۆ قازىر قازاقستان كونسۋلى سول بالانىڭ اكە-شەشەسىمەن بايلانىستا ەكەنىن اتاپ ءوتتى.
«بارلىق قۇجاتتار راسىمدەلىپ جاتىر. سونىمەن قاتار دەنەنى قازاقستانعا جەتكىزۋ ءۇشىن ارنايى اۋە كومپانياسىمەن كەلىسسوزدەر جۇرگىزىپ جاتىر. بالانىڭ شەشەسى قازاق، اكەسى شەتەلدىك ازامات. مارقۇم - قازاقستاننىڭ ازاماتى. كەيىنگى بىرنەشە جىلدا اكە-شەشەسىمەن بىرگە شري-لانكادا تۇرىپ كەلگەن»، - دەدى س ءى م رەسمي وكىلى.
