ۇشقىشتار ەندى پەتروپاۆلدا دايارلانادى: «قىزىل-جار» اۋەجايى جاڭا باعىتتى قولعا الدى

قىركۇيەكتە اۋەجاي بازاسىندا ازاماتتىق اۆياتسيا اكادەمياسىنىڭ العاشقى ستۋدەنتتەرى وقۋ-جاتتىعۋ ۇشۋلارىنا كىرىستى، دەپ حابارلايدى kznews.kz.

العاشقى توپتا التى بولاشاق ۇشقىش بار. ولاردى دايارلاۋ ءۇشىن پەتروپاۆلعا Diamond DA40 جانە Diamond DA42 وقۋ-جاتتىعۋ ۇشاقتارى جەتكىزىلدى. اۆياتسيا داستۇرىنە ساي اۋە كەمەلەرىن پەرروندا سۋ اركاسىمەن قارسى الدى.

DA40 - ءبىر قوزعالتقىشتى، ال DA42 - ەكى قوزعالتقىشتى ءتورت ورىندىق ۇشاق. ولار كاسىبي ۇشقىشتاردى دايارلاۋعا ارنالعان جانە وقۋ باعدارلاماسىنىڭ ءارتۇرلى كەزەڭىندەگى تاپسىرمالاردى ورىنداۋعا مۇمكىندىك بەرەدى.

تەوريادان - ناعىز ۇشۋعا

پەتروپاۆلداعى پراكتيكا كەزىندە ستۋدەنتتەر مارشرۋتتىق ۇشۋلار ورىندايدى، ارنايى پيلوتاج ايماقتارىندا شەبەرلىگىن شىڭدايدى. سونداي-اق ۆيزۋالدى جانە اسپاپتار بويىنشا قونۋعا كىرۋ تاسىلدەرىن مەڭگەرەدى. باعدارلامادا تۇنگى ۇشۋلار دا قاراستىرىلعان.

وسىلايشا، بولاشاق ۇشقىشتار اۋديتوريادا العان ءبىلىمىن ناقتى اۋەايلاق جاعدايىندا تاجىريبەمەن ۇشتاستىرادى.

پەتروپاۆلدىڭ وقۋ الاڭى رەتىندە تاڭدالۋى دا كەزدەيسوق ەمەس. مۇندا اۋە قوزعالىسىنىڭ قارقىندىلىعى، ءوڭىردىڭ جازىق ورماندى دالادا ورنالاسۋى، كۇندىزگى ۋاقىتتىڭ ۇزاقتىعى جانە حالىقارالىق اۋەجايدىڭ دايىن ينفراقۇرىلىمى ەسكەرىلگەن. بۇل فاكتورلار وقۋ-جاتتىعۋ ۇشۋلارىن جۇيەلى ۇيىمداستىرۋعا مۇمكىندىك بەرەدى.

اۋەجايدىڭ جاڭا ميسسياسى

جوبا تەك ۇشقىشتاردى دايارلاۋمەن شەكتەلمەۋى مۇمكىن. الداعى ۋاقىتتا «قىزىل-جار» اۋەجايىندا اۆياتسيالىق ينجەنەرلىك ماماندىقتاردا وقيتىن ستۋدەنتتەردىڭ دە پراكتيكادان وتۋىنە جاعداي جاساۋ ماسەلەسى قاراستىرىلىپ جاتىر.

بۇل جاعدايدا پەتروپاۆل اۋەجايى ۇشۋ دايارلىعى مەن ينجەنەرلىك پراكتيكانى ءبىر الاڭدا بىرىكتىرەتىن ماۋسىمدىق وقۋ-وندىرىستىك بازاعا اينالماق.

«ءبىز پەتروپاۆل اۋەايلاعىن ازاماتتىق اۆياتسيا اكادەمياسىنىڭ ماۋسىمدىق وقۋ-وندىرىستىك بازاسى رەتىندە قاراستىرامىز. جوبانىڭ نەگىزى رەتىندە اۋەجايدىڭ قولدانىستاعى ينفراقۇرىلىمى الىنادى، ونى ءبىز ءبىلىم بەرۋ پروتسەسىنە بەيىمدەۋدى جوسپارلاپ وتىرمىز. بۇل ۇشۋ دايارلىعى مەن ينجەنەرلىك پراكتيكانى ءبىر جەردە ۇشتاستىرۋعا مۇمكىندىك بەرەدى»، - دەدى «قىزىل-جار» حالىقارالىق اۋەجايىنىڭ ديرەكتورى ابۋل كەكىلبايەۆ.

ونىڭ ايتۋىنشا، ستۋدەنتتەردىڭ ناقتى جۇمىس جاعدايىندا تاجىريبە جيناۋى ماڭىزدى. بولاشاق ماماندار ۇشاقتى ۇشۋعا دايىنداۋدان باستاپ، ونىڭ تەحنيكالىق جاعدايىن باعالاۋعا جانە اۋەجايداعى ءتۇرلى قىزمەتتەردىڭ ءوزارا جۇمىسىن تۇسىنۋگە دەيىنگى پروتسەستەرمەن تانىسا الادى.

اۋەجاي ينفراقۇرىلىمى جاڭعىرتىلىپ كەلەدى

پەتروپاۆل اۋەجايىن دامىتۋ جۇمىستارىنا 2022-جىلدان بەرى «قىزىل-جار حالىقارالىق اۋەجايى» ج ش س ارقىلى قاتىسىپ كەلەدى. كومپانيا اۋەجايدى سەنىمگەرلىك باسقارۋ اياسىندا ونىڭ قىزمەتى مەن ينفراقۇرىلىمىن دامىتۋعا قارجى باعىتتاعان.

وسى كەزەڭدە اۆياوتىن قويماسى جاڭعىرتىلىپ، تەرمينال، اۆاريالىق-قۇتقارۋ ستانسياسى مەن ينجەنەرلىك جۇيەلەر جوندەلدى. سونداي-اق اۋەجاي تەحنيكاسىنا قىزمەت كورسەتۋگە، نىساندى كۇتىپ ۇستاۋعا جانە قىزمەتكەرلەردى وقىتۋعا قاراجات ءبولىندى.

ەندى وسى ينفراقۇرىلىمنىڭ ءبىر بولىگى جاڭا مىندەتكە - وتاندىق اۆياتسيا ءۇشىن كاسىبي كادرلار دايارلاۋعا قىزمەت ەتپەك.