شەكارادان قىتايعا 205 دانا اقبوكەن ءمۇيىزىن الىپ وتپەك بولعان
استانا. KAZINFORM - جول تالعامايتىن كولىكتىڭ جۇرگىزۋشىسى قوسالقى دوڭگەلەككە جاسىرۋ ارقىلى 205 دانا اقبوكەن ءمۇيىزىن زاڭسىز وتكىزبەك بولعان. بۇل تۋرالى ق ر ق م مەملەكەتتىك كىرىستەر كوميتەتىنىڭ باسپا ءسوز قىزمەتى حابارلادى.
13-ناۋرىزدا قىتايمەن شەكارالاس كەدەندىك باقىلاۋ كەزىندە جەتىسۋ وبلىسى بويىنشا «قورعاس ح ش ى و» كەدەن بەكەتىنىڭ لاۋازىمدى تۇلعالارى مەن ق ر ۇلتتىق قاۋىپسىزدىك كوميتەتىنىڭ شەكارا قىزمەتىمەن بىرلەسىپ، «Toyota» اۆتوكولىگىن باسقارعان قازاقستان رەسپۋبليكاسىنىڭ ازاماتى «س» كەدەندىك باقىلاۋدان قوسالقى دوڭگەلەكتە جاسىرىلعان «كيىك مۇيىزدەرى» انىقتالدى. زاڭ بۇزۋشىلىق جۇرگىزۋشىمەن اڭگىمەلەسۋ ءارى كولىك قۇرالىن تەكسەرۋ بارىسىندا بەلگىلى بولعان.
بۇل كولىك قازاقستان رەسپۋبليكاسىنان «قورعاس ح ش ى و» ا ە ا اۋماعىنا باعىت العان جەرىنەن ۇستالدى.
اتالعان فاكت بويىنشا قازاقستان رەسپۋبليكاسىنىڭ زاڭناماسىندا كوزدەلگەن پروتسەسسۋالدىق ارەكەتتەر جۇرگىزىلىپ جاتىر.
«مۇنداي ارەكەت ءۇشىن جاۋاپكەرشىلىك قازاقستان رەسپۋبليكاسى قىلمىستىق كودەكسىنىڭ 339-1-بابىندا «كيىكتى زاڭسىز قولعا ءتۇسىرۋ، جويۋ، سول سياقتى زاڭسىز قولعا تۇسىرىلگەن كيىكتى نەمەسە ونىڭ دەريۆاتتارىن، ونىڭ ىشىندە مۇيىزدەرىن يەمدەنۋ، ساقتاۋ، وتكىزۋ، اكەلۋ، اكەتۋ، جونەلتۋ» قاراستىرىلعان» - دەلىنگەن حابارلامادا.
ايتا كەتەيىك، «قورعاس ح ش ى و» 2023 -جىلدىڭ 24-ساۋىرىنەن باستاپ جۇمىس ىستەيدى. اشىلعان كۇننەن باستاپ كەدەن ورگاندارى جۇرگىزگەن ءىس-شارالاردىڭ ناتيجەسىندە كەدەن زاڭناماسىن بۇزۋدىڭ 797 فاكتىسى انىقتالىپ، 134 اكىمشىلىك ءىس قارالىپ، 40,5 ميلليون تەڭگەدەن استام ايىپپۇل ءوندىرىلدى.
قۇقىق بۇزۋشىلىقتاردىڭ ىشىندە:
- تاۋارلاردى جالعان دەكلاراتسيالاۋ 181 فاكتىسى (تەرى بۇيىمدارى، ۇيالى تەلەفوندار، تەلەفون اكسەسسۋارلارى)؛
- جەكە پايدالانۋعا ارنالعان تاۋارلاردى دەكلاراتسيالاماۋدىڭ 188 فاكتىسى؛
- جالپى سوماسى 2,8 ميلليون ا ق ش دوللارىن قۇرايتىن دەكلاراتسيالانباعان قۇراجاتتى تاسىمالداۋ ارەكەتىنىڭ 172 فاكتىسى.
- حالىقارالىق پوشتا جونەلتىلىمدەرىن تاسىمالداۋ ءتارتىبىن بۇزۋدىڭ 256 فاكتىسى بار.
سونداي-اق، سوت شەشىمىمەن تاركىلەۋ تۋرالى مەملەكەت كىرىسىنە مىنالار تاركىلەندى:
- Volkswagen ،Toyota Ipsum كولىك قۇرالدارى؛
- 912 بلوك ءار ءتۇرلى ماركالى تەمەكى ونىمدەرى.
