شەكارا ماڭىنداعى اۋدانداردىڭ تۇرعىندارىنا قانداي جاعداي جاسالادى

Фото: Kazinform
Фото: Kazinform

استانا. KAZINFORM – ق ر ۇلتتىق ەكونوميكا مينيسترلىگى شەكارا ماڭىنداعى ەلدى مەكەندەردى دامىتۋعا قولداۋ جاساۋ ماسەلەسىنە قاتىستى تۇسىنىك بەردى.

«جالپى، ۇكىمەت شەكارا ماڭىنداعى اۋماقتاردى دامىتۋ بويىنشا ءتيىستى جۇمىستاردى ەلدىڭ بارلىق سالانى دامىتۋعا باعىتتالعان قولدانىستاعى باعدارلامالىق قۇجاتتار اياسىندا جۇزەگە اسىرىپ جاتىر. مەملەكەت باسشىسىنىڭ تاپسىرماسىنا سايكەس، اۋىلدىق اۋماقتاردى دامىتۋدىڭ 2023-2027-جىلدارعا ارنالعان تۇجىرىمداماسىنا شەكارا ماڭىنداعى اۋماقتاردى دامىتۋ بويىنشا جەكەلەي ءبولىمدى ەنگىزۋ بولىگىندە وزگەرىستەر مەن تولىقتىرۋلار ەنگىزىلىپ، ىسكە اسىرىلىپ جاتىر. وسى قۇجاتتار اياسىنداعى شارالار ەكونوميكانى، ينفراقۇرىلىمدى، ءتۋريزمدى، شەكارا ماڭىنداعى ساۋدانى دامىتۋ، جۇمىس ورىندارىن قۇرۋ، مەملەكەتتىك شەكارانى كەسىپ ءوتۋ ورىندارىن رەتتەۋ جانە باسقا دا ماسەلەلەردى شەشۋگە باعىتتالعان. «اۋىل - ەل بەسىگى» باعدارلاماسى اياسىندا شەكارا ماڭىنداعى اۋىلداردا الەۋمەتتىك جانە ينجەنەرلىك ينفراقۇرىلىمدى دامىتۋعا ەرەكشە كوڭىل بولىنەدى. ماسەلەن، 2019- 2023-جىلدارى دەنساۋلىق ساقتاۋ، ءبىلىم بەرۋ، مادەنيەت، سپورت، ەلەكترمەن، جىلۋمەن، گازبەن، سۋمەن جابدىقتاۋ وبەكتىلەرىن جانە جولدار سالۋ، رەكونسترۋكتسيالاۋ ءارى جوندەۋ بويىنشا 1 795 جوبا ىسكە اسىرىلدى»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

بۇدان باسقا، تۇرعىن ءۇي- كوممۋنالدىق ينفراقۇرىلىمدى دامىتۋدىڭ 2023-2029-جىلدارعا ارنالعان تۇجىرىمداماسىنىڭ اياسىندا شەكارا ماڭىنداعى اۋىلداردىڭ تۇرعىندارى ءۇشىن تۇرعىن ۇيلەر سالۋ، «اۋىل اماناتى» باعدارلاماسى شەڭبەرىندە شاعىن كرەديتتەر بەرۋ، «قولجەتىمدى ينتەرنەت» ۇلتتىق جوباسى بويىنشا ەلىمىزدىڭ 17 ءوڭىرىنىڭ 3010 ەلدى مەكەنىنە (ونىڭ ىشىندە 71 شەكارا ماڭىنداعى اۋىلدى ەلدى مەكەنە، 44 مىڭ ادامدى قامتي وتىرىپ) تالشىقتى-وپتيكالىق بايلانىس جەلىلەرى ارقىلى ينتەرنەتتىڭ جوعارى جىلدامدىعىن بەرۋ جۇمىستارى اتقارىلىپ جاتىر. سۋبسيديالاۋ جونىندەگى جوبا اياسىندا 1123 ەلدى مەكەندە (ونىڭ ىشىندە 514 شەكارا ماڭىنداعى اۋىل) تالشىقتى-وپتيكالىق بايلانىس جەلىلەرى ارقىلى جەرگىلىكتى جەلىلەردى سالۋ ەسكەرىلگەن. سونىمەن قاتار، Starlink جۇيەسىن پايدالانا وتىرىپ، شالعايداعى اۋىل مەكتەپتەرىن قوسۋ جونىندەگى پيلوتتىق جوبا شەڭبەرىندە ەلدىڭ 1993 مەكتەبىن (ونىڭ ىشىندە 602 شەكارا ماڭىنداعى اۋىلداردىڭ مەكتەبى) قوسۋ بويىنشا جۇمىستار اتقارىلىپ جاتىر.

«قازىرگى كەزدە ق ر ۇكىمەتىنىڭ 2015-جىلعى 31-جەلتوقسانداعى 1193-قاۋلىسىنا سايكەس، اۋىلدى ەلدى مەكەندەردىڭ ماماندارىنا كولەمى %25 ۇستەمەاقى بەلگىلەنگەن. بۇدان باسقا، مۇددەلى مەملەكەتتىك ورگاندارمەن تابيعي- كليماتتىق جاعدايلارى كۇردەلى شالعايداعى شەكارا ماڭىنداعى اۋدانداردىڭ تۇرعىندارى ءۇشىن جالاقىعا ۇستەمەاقىنى، ەڭبەك ءوتىلىن ەسەپتەۋدىڭ ەرەكشە نورمالارىن ەنگىزۋ ماسەلەسى پىسىقتالىپ جاتىر»، - دەپ اتالىپ وتكەن ۆەدومستۆو اقپاراتىندا.

سوڭعى جاڭالىقتار