شەكارا بولىمدەرىندەگى قۇرىلىس جۇمىستارى نە سەبەپتى كەشىگىپ جاتىر
استانا. KAZINFORM - بۇگىن سەناتتا ق ر ۇلتتىق قاۋىپسىزدىك كوميتەتى شەكارا قىزمەتىنىڭ شەكارا بولىمدەرىنىڭ عيماراتتارى مەن قۇرىلىسجايلارىن سالۋ جانە جاڭعىرتۋ تاقىرىبى قارالدى. ونىڭ بارىسىندا شەكارا بولىمدەرىن سالۋ كەزىندەگى كەمشىلىكتەر ءمالىم بولدى.

- 2024-2028 - جىلدارعا ارنالعان شەكارا قاۋىپسىزدىگىن قامتاماسىز ەتۋدىڭ كەشەندى جوسپارىندا 50 بەكەت بويىنشا قۇرىلىس جۇمىستارى قاراستىرىلعان. باعدارلامانىڭ اكىمشىسى رەتىندە كولىك مينيسترلىگى بەكىتىلگەن. 2023 - جىلى 20 شەكارا بولىمشەسىن سالۋ قاراستىرىلعان. الايدا ءتيىستى مەرزىمدە بۇل نىساندار تاپسىرىلمادى، - دەدى ق ر ۇلتتىق قاۋىپسىزدىك كوميتەت ءتوراعاسىنىڭ ورىنباسارى - شەكارا قىزمەتىنىڭ ديرەكتورى ەرلان الداجۇمانوۆ.
ونىڭ ايتۋىنشا، قازىرگى كەزدە 20 شەكارا بولىمشەسىنە قاتىستى قوسىمشا جوبالاۋ- سمەتالىق قۇجاتتاما ازىرلەنىپ جاتىر. قالعان 10 بولىمشە بويىنشا ۇلتتىق ەكنوميكا مينيسترلىگىنەن ەكونوميكالىق نەگىزدەمە الۋ جوسپارلانعان.
- 2024 - جىلدىڭ جەلتوقسان ايىندا سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەلەرى سولتۇستىك قازاقستان وبلىسىنا ساپارى كەزىندە شەكارا ءبولىمىنىڭ قۇرىلىسىنا قاتىستى ناقتى جاعدايدى كوردى. وسىنداي جاعداي قۇرلىسى اياقتالماعان 19 نىساندا دا بايقالىپ وتىر. ولاردىڭ كەيبىرىندە ىرگەتاسىن قالاۋ جۇمىستارى دا اياقتالماعان. قازىر ورىندالعان جۇمىستىڭ جالپى كورسەتكىشىنە توقتالساق، 60-80 پايىزدان اسپايدى. وسى ماسەلە بويىنشا ءتۇرلى الاڭداردا وتكەن جيىنداردا كولىك مينيسترلىگىنىڭ، مەردىگەرلەردىڭ وكىلدەرىن تىڭداپ شىقتىق. بۇل رەتتە، ايىپپۇل سالۋ سانكتسيالارى ەشقانداي ناتيجە بەرمەدى. سونىڭ سالدارىنان اتالعان نىسانداردىڭ قۇرىلىسىن اياقتاۋ مەرزىمى 2025 -جىلعا اۋىستىرىلدى. بۇل جاعداي ەلىمىزدىڭ سولتۇستىك وڭىرلەرىندەگى شەكارادا قورعانىس قابىلەتىن كۇشەيتۋگە بولىنگەن بيۋدجەت قاراجاتىن ءتيىمدى پايدالانۋ جۇمىسىنا نۇقسان كەلتىرىپ جاتىر، - دەدى شەكارا قىزمەتىنىڭ ديرەكتورى.
سەناتور اندرەي لۋكين جاقىندا سقو اۋماعىنداعى شەكارا بولىمشەلەرىنە دەپۋتاتتار بارعانىن ەسكە سالدى.
- سول كەزدە قۇرىلىس توقتاپ، جۇمىس جۇرگىزىلمەي جاتقانىن ءوز كوزىمىزبەن كوردىك. ونى توقتاتۋدىڭ سەبەبىن انىقتاۋعا تىرىستىق، ءبىراق ناقتى جاۋاپ الا المادىق… وسى ماسەلەنى ءماجىلىس جانە سەنات دەپۋتاتتارى كەيىنگى 3 جىلدا بىرنەشە رەت كوتەرگەن ەدى. زاڭنامالىق بازا بار، ءتيىستى قارجى ءبولىنىپ جاتىر. دەگەنمەن، ماسەلە ءالى دە شەشىلمەگەن. مۇنداي جاعدايلاردا باس پروكۋراتۋرا قاداعالاۋشى ورگان رەتىندە «مەملەكەتتىك ساتىپ الۋ تۋرالى» زاڭنىڭ دۇرىس ورىندالۋىن، ال قارجىلىق مونيتورينگ اگەنتتىگى مەن انتيكور مەملەكەت باسشىسىنىڭ مەملەكەتتىك ساتىپ الۋ جانە بيۋدجەت قاراجاتىنىڭ ماقساتتى جۇمسالۋىن قاداعالاۋ جونىندەگى تاپسىرمالارىنىڭ قالاي ورىندالىپ جاتقانىن تەكسەرۋگە مىندەتتى، - دەدى ا. لۋكين.
ەسكە سالا كەتەيىك، قىرعىزستان مەن تاجىكستان مەملەكەتتىك شەكارا ماسەلەسىن تۇپكىلىكتى قاشان شەشەتىنىن جازعان بولاتىنبىز.