شەكارا بولىمدەرى سالۋداعى پروبلەما: قۇرىلىس 2025-جىلى اياقتالادى

استانا. KAZINFORM — ق ر كولىك ۆيتسە-ءمينيسترى ءساتجان ابلاليەۆ سولتۇستىك وڭىرلەردەگى شەكارا بولىمدەرىنىڭ عيماراتتارى مەن قۇرىلىسجايلارىن سالۋ جۇمىستارى نەلىكتەن كەشەۋىلدەگەنىن ءتۇسىندىردى.

пункт пропуска на границе шекаралық бақылау бекеті
Фото: Александр Павский/ Kazinform

ايتا كەتەيىك، ق ر ۇلتتىق قاۋىپسىزدىك كوميتەتى شەكارا قىزمەتىنىڭ ەل وڭىرلەرىندەگى بولىمشەلەرىنىڭ قۇرىلىسىنا قاتىستى باعدارلامانىڭ اكىمشىسى رەتىندە كولىك مينيسترلىگى بەكىتىلگەن. بۇگىن سەناتتا وسى تاقىرىپقا قاتىستى وتكەن وتىرىستان كەيىنگى باسپا ءسوز ءماسليحاتىندا جاۋاپتى ۆەدومستۆو وكىلدەرى شەكارا بولىمشەلەرىندەگى جاعدايعا تۇسىنىك بەردى.

ءساتجان ابلاليەۆ 2023-جىلى قۇرىلىس جۇمىستارىندا قارجىلاندىرۋ تولىق بولماعانىن، ال 2024-جىلى سۋ تاسقىنى كەزىندەگى قيىندىقتار اسەر ەتكەنىن اتاپ ءوتتى.

ونىڭ ايتۋىنشا، جۇمىس كەستەسىن بۇزعان مەردىگەر ۇيىمدارعا ايىپپۇل سالۋ تۋرالى ەسكەرتۋ جولدانعان، ال 20-نىسان قۇرىلىسىنىڭ ءبىرىنشى كەزەڭىن 2025-جىلى اياقتاۋ جوسپارلانىپتى.

— 2028-جىلدىڭ اياعىنا دەيىن جالپى 50 بولىمشەنىڭ قۇرىلىسى تاپسىرىلۋى كەرەك. ولار نەگىزىنەن رەسەيمەن اراداعى شەكارادا بولادى. قازىرگى كەزدە ونىڭ 20 سىندا قۇرىلىس جۇمىستارى ءجۇرىپ جاتىر. اتاپ ايتقاندا، 54 ميلليارد تەڭگەگە وسى 20-شەكارا بولىمشەسى سالىنادى، — دەدى تىلشىلەر سۇراعىنا جاۋاپ بەرە وتىرىپ.

ۆيتسە-مينيستر 20-بولىمشەنىڭ قۇرىلىسى 2025-جىلى جالعاساتىنىن جانە وعان قوسىمشا قاراجات بولىنبەيتىنىن ايتتى.

— مەردىگەر كومپانيا مەن تاپسىرىس بەرۋشىلەر بولىنگەن قاراجات بويىنشا نىسانداردى سالادى. جالپى، بۇل ماسەلەدە بۇعان دەيىن قاراجاتتى ۋاقىتىندا بولمەۋ دەرەكتەرى بولدى جانە مەردىگەردىڭ تولىق موبيليزاتسيا جاساماۋى كەمشىلىگى ورىن الدى. سوعان بايلانىستى قازىر ورتاق شەشىمگە كەلىپ، بولىنگەن قاراجاتتىڭ كولەمىندە 2025-جىلى نىسانداردىڭ قۇرىلىسىن اياقتاۋعا كەلىستىك. قازىر مەردىگەردى اۋىستىرۋ ءتيىمدى بولمايدى دەپ سانايمىز. سەبەبى، اتقارىلاتىن قالعان جۇمىستار سونشالىقتى اۋقىمدى ەمەس. ال جاڭا مەردىگەردى ىرىكتەۋگە تاعى قوسىمشا ۋاقىت پەن قاراجات كەرەك. سوندىقتان وسى مەردىگەرمەن نىسانداردى پايدالانۋعا بەرەمىز. اتاپ ايتقاندا، بۇدان باسقا سالىناتىن 30-شەكارا بولىمشەسىنە جاڭادان ساتىپ الۋ پروتسەسى ۇيىمداستىرىلىپ، باسقا كومپانيالار ىرىكتەلەدى، — دەدى ءساتجان ابلاليەۆ.

بۇدان بۇرىن حابارلانعانداي، بۇگىن سەناتتا ق ر ۇلتتىق قاۋىپسىزدىك كوميتەتى شەكارا قىزمەتىنىڭ شەكارا بولىمدەرىنىڭ عيماراتتارى مەن قۇرىلىسجايلارىن سالۋ جانە جاڭعىرتۋ تاقىرىبى قارالدى. ونىڭ بارىسىندا شەكارا بولىمدەرىن سالۋ كەزىندەگى كەمشىلىكتەر ءمالىم بولدى.

ق ر ۇلتتىق قاۋىپسىزدىك كوميتەت ءتوراعاسىنىڭ ورىنباسارى — شەكارا قىزمەتىنىڭ ديرەكتورى ەرلان الداجۇمانوۆتىڭ سوزىنە قاراعاندا، 2024-2028-جىلدارعا ارنالعان شەكارا قاۋىپسىزدىگىن قامتاماسىز ەتۋدىڭ كەشەندى جوسپارىندا 50 بەكەت بويىنشا قۇرىلىس جۇمىستارى قاراستىرىلعان. باعدارلامانىڭ اكىمشىسى رەتىندە كولىك مينيسترلىگى بەكىتىلگەن. 2023-جىلى 20-شەكارا بولىمشەسىن سالۋ قاراستىرىلعان. الايدا ءتيىستى مەرزىمدە بۇل نىساندار تاپسىرىلماي كەلەدى.

وتىرىس بارىسىندا بيۋدجەت قارجىسىن ماقساتتى تۇردە پايدالانۋعا باقىلاۋدى كۇشەيتۋ ماسەلەسى مەن تاپسىرىس بەرۋشىلەر، مەردىگەرلەر جانە قاداعالاۋ ورگاندارى اراسىنداعى ءوزارا ءىس-قيمىلدى جاقسارتۋ جونىندەگى ۇسىنىستار تالقىلاندى. سەناتورلار قۇرىلىس مەرزىمىن ساقتاۋ جانە ەكىنشى كەزەڭدەگى قۇرىلىسقا ارنالعان جوبالاۋ-سمەتالىق قۇجاتتامانى ازىرلەۋ قاجەتتىگىنە ەرەكشە نازار اۋداردى. ەكىنشى كەزەڭ اياسىندا تاعى 30 شەكارالىق نىسان سالۋ جوسپارلانىپ وتىر.

كەزدەسۋگە قاتىسۋشىلار بارلىق تاراپتىڭ مىندەتتەمەلەردى قاتاڭ ورىندالۋى ماڭىزدى ەكەنىن جانە مۇنداي ايرىقشا جوبالاردى جۇزەگە اسىرۋدا جاۋاپكەرشىلىكتى ارتتىرۋ قاجەتتىگىن اتاپ ءوتتى.

سوڭعى جاڭالىقتار