جۇرگىزۋشى كۋالىگى مەن ديپلوم eGov قوسىمشاسىندا پايدا بولۋى مۇمكىن
سيفرلىق دامۋ ءمينيسترى اسقار جۇماعاليەۆتىڭ توراعالىعىمەن وتكەن مەملەكەتتىك قىزمەتتەردى وڭتايلاندىرۋ جانە اۆتوماتتاندىرۋ جونىندەگى ۆەدومستۆوارالىق كوميسسيانىڭ وتىرىسىندا وسىنداي ۇسىنىس ايتىلدى.
«ۇ ا ت» ا ق باسقارما ءتوراعاسى اسەت تۇرىسوۆ مەملەكەتتىك ورگان وكىلدەرىنە ازاماتتاردىڭ موبيلدىك قوسىمشاعا ەنگىزىلگەن قۇجاتتارىنىڭ ءتىزىمىن كەڭەيتۋدى ۇسىندى.
«بۇگىنگى كۇنى ازاماتتار eGov موبيلدىك قوسىمشاسىنان ءوزىنىڭ جەكە كۋالىگىن كورە الادى. ەگەر وزىمەن بىرگە جەكە كۋالىكتىڭ ءتۇپنۇسقاسى بولماعان جاعدايدا، موبيلدىك قوسىمشاداعى قۇجاتتى پايدالانا الار ەدى. ءدال وسىنداي پرينتسيپپەن ديپلوم، جۇرگىزۋشى كۋالىگى، تەحنيكالىق ءتولقۇجات جانە باسقا دا قۇجاتتاردى ورنالاستىرۋعا بولادى»، - دەدى اسەت تۇرىسوۆ.
ۆەدومستۆوارالىق كوميسسيانىڭ ءتوراعاسى، سيفرلىق دامۋ ءمينيسترى اسقار جۇماعاليەۆ بۇل يدەيانى جۇزەگە اسىرۋدا مەملەكەتتىك ورگاندارعا قولداۋ كورسەتۋگە دايىن ەكەنىن ءبىلدىردى.
«ءبىز ءوز تاراپىمىزدان مەملەكەتتىك ورگاندارعا بارىنشا قولداۋ كورسەتۋگە دايىنبىز. ازاماتتىڭ بارلىق قۇجاتتارىنىڭ ءبىر قوسىمشادا ورنالاسۋى وتە ىڭعايلى بولار ەدى. وسىعان وراي، مەملەكەتتىك ۇيىمداردىڭ سيفرلىق قۇجاتتاردى تۇپنۇسقامەن تەڭ دارەجەدە قابىلداۋ ماسەلەسىن شەشۋ قاجەت»، - دەدى مينيستر.
«ازاماتتارعا ارنالعان ۇكىمەت» ك ە ا ق باسقارما ءتوراعاسى اسەمگۇل بالتاشەۆا ءوز كەزەگىندە، حقو- دا ازاماتتار جەكە كۋالىگىنىڭ ءتۇپنۇسقاسىن ۇسىنباي-اق، ونى eGov قوسىمشاسى ارقىلى كورسەتە الاتىنىن ايتتى.
كوميسسيا وتىرىسىندا سونداي-اق، الداعى جۇمىس جوسپارلارى تالقىلانىپ، مەملەكەتتىك قولداۋ جانە مەملەكەتتىك قىزمەتتەردى اۆتوماتتاندىرۋ شارالارىن مەرزىمىنەن كەشىكتىرمەۋ، مەملەكەتتىك ورگانداردىڭ اقپاراتتىق جۇيەلەرىن ۋاقتىلى ينتەگراتسيالاۋ قاجەتتىگى ايتىلدى.
سيفرلىق كوميسسارلار كوتەرگەن ماسەلەلەر دە تالقىلاندى. اتاپ ايتقاندا، كوميسسيا جەكە كۋالىكتى ونلاين اۋىستىرۋ قىزمەتىنە باسا نازار اۋداردى. قىزمەتتى ونلاين كورسەتۋدەن باس تارتۋ كورسەتكىشىنىڭ %80 ى پايدالانۋشىلاردىڭ ساپاسىز فوتو ۇسىنۋىنا بايلانىستى. وسى ورايدا، اسقار جۇماعاليەۆ قىزمەت كورسەتۋشىگە بۇل ماسەلەنى شەشۋ جولدارىن «ۇ ا ت» ا ق-مەن بىرلەسە پىسىقتاۋدى تاپسىردى.
«ارىپتەستەر، ەگەر 100 ءوتىنىمنىڭ 80 ى فوتونىڭ ساپاسىز بولۋىنا بايلانىستى قابىلدانبايتىن بولسا، وندا بۇل ماسەلەنى شەشۋ قاجەت، انىقتاۋ كەرەك»، - دەدى جۇماعاليەۆ.
بۇل ۆەدومستۆوارالىق كوميسسيانىڭ 57-وتىرىسى ەكەنىن ايتىپ وتكەن ءجون. كوميسسيا قابىلداعان شەشىمدەر مەن مەملەكەتتىك ورگاندار جۇرگىزگەن جۇمىس ناتيجەسىندە 231 مەملەكەتتىك قىزمەت اۆتوماتتاندىرىلدى جانە وڭتايلاندىرىلدى. وسىنىڭ ەسەبىنەن تالاپ ەتىلەتىن قۇجاتتاردىڭ ورتاشا پاكەتى %30 عا ازايىپ، قىزمەت كورسەتۋدىڭ ورتاشا مەرزىمى 3 ەسە (31 كۇننەن 10 كۇنگە دەيىن) قىسقاردى.
