شەتەلدەگى قازاقستاندىقتار eGov.kz جاڭا 5 قىزمەتىن پايدالانا الادى

نۇر- سۇلتان. قازاقپارات - شەتەلدەگى قازاقستاندىقتار ءۇشىن eGov.kz جاڭا 5 قىزمەت قولجەتىمدى، دەپ حابارلايدى قازاقپارات ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.

ەلدەن تىس جەرلەردە تۇراتىن قازاقستان ازاماتتارى ەندى eGov.kz ينتەرنەت- پورتالى ارقىلى نەكەگە تۇرۋعا نەمەسە ونى بۇزۋعا، تۋۋدى، قايتىس بولۋدى تىركەۋگە جانە اتىن، تەگىن، اكەسىنىڭ اتىن اۋىستىرۋعا قۇجاتتاردى تاپسىرا الادى. اكتىلىك جازبانىڭ تىركەلگەنى تۋرالى قازاقستاننىڭ ءتيىستى شەت ەلدەردەگى مەكەمەسىنەن حابارلاما العان كەزدە ءوتىنىش بەرۋشى دايىن كۋالىكتى قازاقستاننىڭ شەت ەلدەردەگى ەلشىلىگىنەن نەمەسە كونسۋلدىعىنان الۋى قاجەت. بۇگىنگى تاڭدا بۇل مۇمكىندىك الەمنىڭ 20-دان استام نۇكتەسىندە بار.

قىزمەتتەردى «ۇلتتىق اقپاراتتىق تەحنولوگيالار» اق مەن سيفرلىق دامۋ، يننوۆاتسيالار، اەروعارىش ونەركاسىبى مينيسترلىگى سىرتقى ىستەر مينيسترلىگىمەن جانە ادىلەت مينيسترلىگىمەن بىرلەسىپ ىسكە اسىردى. eGov.kz.

پورتالىنىڭ «وتباسى» بولىمىندە نەكە قيۋدى نەمەسە ونى بۇزۋدى مەملەكەتتىك تىركەۋ ءۇشىن ءتيىستى قىزمەتتى تابۋ، قاجەتتى جولداردى تولتىرۋ جانە كونسۋلدىق الىم تولەمى تۋرالى چەكتى جۇكتەۋ، بۇدان ءارى ەتسق نەمەسە SMS- پارول ارقىلى سۇراۋ سالۋعا قول قويۋ قاجەت. وسىدان كەيىن ەرلى- زايىپتىلاردىڭ ءبىرىنىڭ جەكە كابينەتىنە ءوتىنىمدى كەلىسۋ قاجەتتىلىگى تۋرالى حابارلاما جىبەرىلەدى. ول قاجەتتى جولداردى تولتىرادى جانە سۇراۋعا قول قويادى.

قىزمەت كورسەتۋ مەرزىمى – 1 اي. شەتەلدە بالانىڭ تۋۋىن تىركەۋ ءۇشىن پايدالانۋشى قاجەتتى جولداردى تولتىرۋى، سۇرالعان قۇجاتتاردى، كونسۋلدىق الىمدى تولەۋ تۋرالى چەكتى جۇكتەۋى جانە وتىنىشكە قول قويۋى قاجەت. قىزمەت كورسەتۋ مەرزىمى - 3 جۇمىس كۇنى. اتىن، تەگىن، اكەسىنىڭ اتىن وزگەرتۋ ءۇشىن ءدال وسىنداي ارەكەتتەردى ورىنداۋىڭىز كەرەك، ءبىراق مەرزىمى 30 كۇنتىزبەلىك كۇندى قۇرايدى. قايتىس بولۋدى تىركەۋ كەزىندە قايتىس بولعان ادامنىڭ جسن- ءىن كورسەتۋ، قاجەتتى جولداردى تولتىرۋ جانە سۇراۋ سالۋعا قول قويۋ قاجەت. قىزمەت 1 جۇمىس كۇنى ىشىندە كورسەتىلەدى.