شەشەنستاننان 31 جىل بۇرىن كوشىپ كەلگەن ايەل ەندى عانا قازاقستان ازاماتتىعىن الدى
ورال. KAZINFORM - ب ق و پ د تاسقالا اۋداندىق پوليتسيا ءبولىمى كوشى-قون قىزمەتىنىڭ ينسپەكتورلارى اۋدان تۇرعىنى ليۋدميلا سادىقوۆاعا ازاماتتىق الۋعا كومەكتەستى.
ب ق و پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، ليۋدميلا عابيب قىزى 1993 -جىلعى اقپاندا شەشەنستانداعى سوعىستا جاراقات الىپ، قازاقستانعا كوشىپ كەلگەن.
شەشەنستاننان راستايتىن قۇجاتتار قاجەت بولعاندىقتان، ل. سادىقوۆا ۇزاق ۋاقىت بويى قازاقستان ازاماتتىعىن الا الماعان.
«پوليتسيا قىزمەتكەرلەرى ل. سادىقوۆانىڭ ازاماتتىعى جوق ادام رەتىندە تانىلۋى ءۇشىن قۇجاتتار جيناۋعا قولۇشىن بەردى. كوپ جىلدار بويى ول ازاماتتىعى جوق ادامنىڭ ءتولقۇجاتى بويىنشا ءومىر ءسۇردى. پوليتسيا جاعدايعا تۇسىنىستىكپەن قارادى. تاسقالا اۋدانى پوليتسيا ءبولىمى كوشى-قون قىزمەتىنىڭ قىزمەتكەرى، پوليتسيا مايورى عالىم ءابىلقايىروۆ قۇجاتتاردى الۋعا كومەكتەستى. جەكە باسىن راستاۋ ءۇشىن قاجەتتى وتىنىشتەر جىبەرىلدى. ناتيجەسىندە ليۋدميلا سادىقوۆا ارادا 31 جىل وتكەن سوڭ قازاقستان ازاماتتىعىن جانە كوپتەن كۇتكەن قۇجاتتارىن الدى» دەپ حابارلادى ۆەدومستۆودان.
اۆتور
عايساعالي سەيتاق
