شۋدىڭ سۋىن ەشكىم بۇرىپ العان جوق - مينيسترلىك دەپۋتات ساۋالىنا جاۋاپ بەردى
استانا. KAZINFORM - سۋ رەسۋرستارى جانە يرريگاتسيا مينيسترلىگى ءماجىلىس دەپۋتاتى ماقسات تولىقبايدىڭ الەۋمەتتىك جەلىدە قىزۋ تالقىعا تۇسكەن دەپۋتاتتىق ساۋالىنا جاۋاپ بەردى.
دەپۋتات ءوز ساۋالىندا جامبىل وبلىسىندا شۋ وزەنىنىڭ سۋىن وزىنە بۇرىپ العان فازەندا يەسىنە جەرگىلىكتى اكىمدىك پەن سۋ رەسۋرستارى جانە يرريگاتسيا مينيسترلىگى ەشتەڭە ىستەي الماي وتىرعانىن ايتقان.
مينيسترلىك مويىنقۇم اۋدانىڭ اكىمدىگىنىڭ بەرگەن مالىمەتىن العا تارتىپ، دەپۋتات كەلتىرگەن مالىمەتتىڭ ءبارىن تەرىسكە شىعارىپ وتىر.
- مويىنقۇم اۋدانى اكىمدىگىنىڭ اقپاراتىنا سايكەس، مويىنقۇم اۋدانى اۋماعىندا وزەن ماڭايىندا 68 شاعىن شارۋا قوجالىعى جانە ەكى ءىرى ج ش س بار. ولاردا تيىسىنشە 5800 جانە 1700 باس ءىرى قارا مال ۇستالادى. وزەن ارناسىن ءوز بەتىمەن بۇرۋ فاكتىلەرى بولماعان جانە بارلىق سۋارمالى القاپتار سۋ شارۋاشىلىعى ليميتتەرى مەن رۇقساتتالعان تارتىپكە سايكەس سۋمەن قامتاماسىز ەتىلەدى، - دەپ جازىلعان جاۋاپتا.
مينيسترلىك ماماندارى شۋدىڭ سۋىن مەملەكەت قالاي رەتتەپ وتىرعانىنا كەڭىنەن تۇسىنىكتەمە بەرگەن.
- شۋ وزەنىنىڭ العاشقى تابيعي تارامدانعان بولىگى مويىنقۇم اۋدانىنداعى راداي وزەگى بولىپ ەسەپتەلەدى. مۇندا سۋ الدىمەن كەڭ اۋماققا جايىلادى. بۇل تابيعي فيلتراتسيا مەن سۋدىڭ ءسىڭىرىلۋىن قامتاماسىز ەتەدى. 2024-جىلدىڭ قاراشا ايىندا سۋ كولەمى 120 م³/سەك دەڭگەيىنە دەيىن كوتەرىلگەن كەزدە مۇز راداي ارناسىنداعى بوگەتتى جىرىپ وتكەن. سونىڭ سالدارىنان 2024-جىلدىڭ 23-جەلتوقسانىندا مويىنقۇم مەن قىلىشباي اۋىلدارىن سۋ باسۋ قاۋپى تۋىنداپ، توتەنشە جاعداي جاريالانعان بولاتىن. وسىعان بايلانىستى سۋ كولەمى بىرتىندەپ تومەندەتىلىپ، 2025-جىلدىڭ 17-قاڭتارىندا 90 م³/سەك دەڭگەيىندە تۇراقتاندىرىلدى، - دەلىنگەن مينيسترلىك جاۋابىندا.
جاۋاپتاعى مالىمەتكە سەنسەك، راداي وزەگىنە سۋدى مولىنان جىبەرۋ تاسقىن قاۋپىن تۋىنداتۋى مۇمكىن.
- وسى وقيعالار ەسكەرىلىپ، 2025-جىلى راداي وزەگىنىڭ باسىنا سۋ رەتتەگىش قۇرىلعى ورناتۋ تۋرالى شەشىم قابىلداندى. ياعني، راداي وزەگىنە كوپ مولشەردە اعىن سۋ جىبەرۋ ءقاۋىپتى. بۇل قۇرىلعى - سۋدىڭ تابيعي اعىسىن كەزەڭ- كەزەڭىمەن، ءقاۋىپسىز جانە ءتيىمدى باسقارۋعا، ياعني سۋدى شۋ وزەنىنىڭ نەگىزگى ارناسىمەن جىبەرىپ، سوزاق اۋدانىنا سۋدى جەتكىزۋ ۋاقىتىن ازايتۋعا باعىتتالعان. قازىرگى ۋاقىتتا اكىمدىك تاراپىنان جوبالىق-سمەتالىق قۇجاتتاماسى ازىرلەنۋدە. تاسوتكەل سۋ قويماسىنان 75 م³/سەك سۋ جانە فۋرمانوۆ سۋ تورابىنان قوراعاتى وزەنىنىڭ سۋىن قوسا العاندا 85 م³/سەك سۋدى 1-مامىرعا دەيىن جىبەرۋ تۋرالى كەلىسىلدى. قازىرگى تاڭدا بۇل باعىتتاعى جۇمىستار جۇزەگە اسىرىلىپ جاتىر، - دەپ جازادى مينيسترلىكتەگىلەر.
بۇعان دەيىن ەرتىس وزەنىنە جىبەرىلەتىن سۋدىڭ كولەمى بىلتىرعىدان از بولاتىنى ايتىلعان ەدى.
