شايدىڭ قۇرامىندا بوياعىش بار-جوعىن قالاي انىقتاۋعا بولادى؟

بۇل تۋرالى BAQ. KZ تىلشىسىنە استانا قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى مۇحامعالي ارىسپايەۆ ايتىپ بەردى.

ماماننىڭ سوزىنشە، ۇيدە شايدىڭ ءتۇس بەرۋ جىلدامدىعىن بايقاۋعا بولادى. ول ءۇشىن ءبىر ستاقان سۋىق سۋعا از مولشەردە قۇرعاق شاي سالادى. ەگەر سۋ بىردەن قانىق قوڭىر تۇسكە بويالسا، بۇل ءونىمدى مۇقيات تەكسەرۋگە سەبەپ بولۋى مۇمكىن.

شايدى اق مايلىققا سالىپ، ۇستىنەن ازداپ سۋ بۇركۋگە دە بولادى. مايلىقتا بىردەن ايقىن سارى، قىزعىلت سارى نەمەسە قوڭىر داق پايدا بولسا، بۇل دا كۇمان تۋدىرادى. ءبىراق ۇيدەگى سىناقتار بوياعىش بار ەكەنىن ناقتى دالەلدەمەيدى، - دەدى مۇحامعالي ارىسپايەۆ.

ونىڭ ايتۋىنشا، كەيبىر تۇتىنۋشىلار دەمدەلگەن شايعا ليمون قوسىپ، ءتۇسىنىڭ وزگەرۋىنە قاراي قورىتىندى جاسايدى. الايدا بۇل ءتاسىل دە سەنىمدى ناتيجە بەرمەيدى. شايدىڭ تۇسىنە ونىڭ ءتۇرى، ۇساقتالۋ دارەجەسى جانە دەمدەۋ ءتاسىلى اسەر ەتۋى مۇمكىن.

شاي قۇرامىنداعى بوگدە بوياعىشتى انىقتاۋ ءۇشىن زەرتحانالىق تالداۋ قاجەت. ول ءۇشىن حروماتوگرافيا جانە سپەكتروفوتومەتريا ادىستەرى قولدانىلادى، - دەدى دەپارتامەنت باسشىسىنىڭ ورىنباسارى.

مۇحامعالي ارىسپايەۆ شاي ساتىپ الاردا قاپتاماداعى قۇرامىن، ءوندىرۋشى تۋرالى مالىمەتتى جانە وندىرىلگەن مەكەنجايىن قاراۋعا كەڭەس بەردى. قوسپاسىز شايدىڭ قۇرامىندا شاي جاپىراعى كورسەتىلۋى كەرەك. ال جەمىس-جيدەك ءدامى بار شايدا قوسىمشا ينگرەديەنتتەر بولۋى مۇمكىن جانە ولار زاتبەلگىدە جازىلۋعا ءتيىس.

مامان ە-كودتىڭ نەمەسە حوش يىستەندىرگىشتىڭ كورسەتىلۋى شاي مىندەتتى تۇردە قاۋىپتى دەگەندى بىلدىرمەيتىنىن ايتتى. نەگىزگى ماسەلە - ناقتى قوسپانى شايعا قوسۋعا رۇقسات ەتىلگەن-ەتىلمەگەنى.

2026-جىلعى قاڭتاردا قازاقستاندا ءبىرقاتار قارا شايدى اكەلۋگە جانە ساتۋعا ۋاقىتشا تىيىم سالىندى. سانيتاريالىق-ەپيدەميولوگيالىق باقىلاۋ كوميتەتىنىڭ مالىمەتىنشە، تەكسەرۋ كەزىندە كەيبىر ونىمدەردەن شاي قۇرامىندا قولدانۋعا بولمايتىن ە110، ە102 جانە ە124 بوياعىشتارى انىقتالعان. قاپتامالاردا ءوندىرىس جانە قاپتاۋ مەكەنجايلارى تۋرالى جارامسىز مالىمەتتەر دە بولعان.

كەيىن «اپامنىڭ ءشايى Premium gold»، «وردا كەنيا» جانە «ال-كايرات ءشايى Premium gold» ونىمدەرىنە قاتىستى شەكتەۋلەر الىنىپ تاستالدى. سوندىقتان بۇرىن جاريالانعان تىيىم تىزىمىنە سۇيەنگەندە، ونىڭ كەيىن وزگەرگەن-وزگەرمەگەنىن تەكسەرۋ قاجەت.

شايدىڭ ءتۇسى نەمەسە ءيىسى كۇمان تۋدىرسا، قاپتاماسىن ساقتاپ قويعان ءجون. ال ونىڭ قۇرامىندا بوياعىش بار-جوعىن ناقتى ءبىلۋ ءۇشىن زەرتحانالىق ساراپتاما قاجەت، - دەدى مۇحامعالي ارىسپايەۆ.

ەسكە سالايىق، بۇعان دەيىن قازاقستاندا 9,1 مىڭ توننا شاي جانە كوفە وندىرىلگەنى حابارلاندى.