شارىن ۇلتتىق پاركىندە قىزىل كىتاپقا ەنگەن جانۋارلاردىڭ ۇشاسى تابىلدى

ورمان شارۋاشىلىعى جانە جانۋارلار دۇنيەسى كوميتەتىنىڭ مالىمەتىنشە، 7-قاراشادا مەملەكەتتىك ينسپەكتورلار پوليتسيا قىزمەتكەرلەرىمەن بىرلەسىپ، تابيعات قورعاۋعا باعىتتالعان كۇشەيتىلگەن رەيد جۇرگىزدى. ونىڭ بارىسىندا «شونجى-كوكپەك-الماتى» اۆتوجولىندا كۇدىك تۋدىرعان اۆتوكولىك توقتاتىلعان.

- الدىن الا مالىمەت بويىنشا كولىكتەگى ازاماتتاردىڭ 6-قاراشادا شارىن ۇلتتىق پاركى، تەمىرلىك اۋماعىنا جاقىن جەردە زاڭسىز اڭشىلىق جاساۋعا قاتىسى بولۋى مۇمكىن. وقيعا ورنىندا قاراقۇيرىققا ۇقساس 5 جانۋاردىڭ ۇشاسى تابىلدى. ولاردىڭ ناقتى ءتۇرى مەن جىنىسى ساراپتاما ناتيجەسىندە انىقتالادى، - دەپ حابارلادى كوميتەتتەن.

اتالعان دەرەك بويىنشا ق ر قىلمىستىق كودەكسىنىڭ 337-بابى 4-بولىگىنىڭ 2-تارماعىنا (جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن تۇرلەرىنە، سونداي-اق پايدالانۋعا تىيىم سالىنعان جانۋارلارعا قاتىستى جاسالعان زاڭسىز اڭشىلىق) سايكەس قىلمىستىق ءىس تىركەلگەن. قازىرگى ۋاقىتتا ازاماتتاردىڭ وقيعاعا قاتىسى بار-جوعى بويىنشا تەرگەۋ امالدارى جۇرگىزىلىپ جاتىر.

ەسكە سالايىق، كاسپيدە 88 شاقىرىم براكونەرلىك اۋ مەن 11,5 كەلى ەسىرتكى تاركىلەندى.