شارم-ەش-شەيح اۋەجايىندا كوز جۇمعان ايەل قۇقىق قورعاۋ سالاسىندا جۇمىس ىستەگەن

اقتوبە. KAZINFORM - شارم-ەش-شەيح اۋەجايىندا كوز جۇمعان اقمارال مۇقانوۆا ءبىر كەزدەرى اقتوبە وبلىستىق پوليتسيا دەپارتامەنتىنىڭ كادر باسقارماسىندا جۇمىس ىستەگەن. كەيىن زەينەتكە شىققان.

اقتوبە وبلىستىق پوليتسيا دەپارتامەنتىنىڭ باسپا ءسوز قىزمەتى اقمارال وتەگەن قىزىنىڭ كادر دايىنداۋ ىسىندە كوپ ەڭبەك ەتكەنىن ايتىپ بەردى.

- اقمارال مۇقانوۆا وبلىستىق پوليتسيا دەپارتامەنىنىڭ كادر باسقارماسىندا ابىرويلى ەڭبەك ەتتى. ول قۇقىق قورعاۋ سالاسىندا انتىنا ادال، ىسىنە مىعىم، تاپسىرمانى بۇلجىتپاي ورىندايتىن قىزمەتكەرلەر تاربيەلەدى. قاي كەزدە دە قامقور بولا ءبىلدى. ءوز تاجىريبەسىن ءبولىسىپ، جاس كادردى باعىتتاپ وتىردى. ارىپتەستەرى ونىڭ اشىق-جارقىن، مەيىرىمدى جان دەپ بىلەدى. ول ۇنەمى كۇلىپ جۇرەتىن قاراپايىم ادام ەدى، - دەدى اقتوبە وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ جەتەكشىسى ەربولات سارقۇلوۆ.

ەسكە سالساق، شارم-ەش-شەيح اۋەجايىندا استاناعا دەيىن باراتىن DV5270 رەيسىنە وتىرار كەزدە ءۇش قازاقستاندىق ايەلگە جارناما تاقتاسى قۇلادى. وقيعانىڭ سالدارىنان قازاقستاندىق ايەل مەرت بولدى، تاعى ەكى وتانداسىمىز جاراقات الدى.

قازا تاپقان ايەلدىڭ ۇلى دا جاتىن ورىنمەن قامتاماسىز ەتىلدى. قازاقستان ەلشىلىگىمەن بارلىق قاجەتتى كونسۋلدىق، قۇقىقتىق جانە گۋمانيتارلىق كومەكتەر كورسەتۋ بويىنشا جۇمىس جۇرگىزىلىپ جاتىر.

اۆتور

التىناي ساعىندىقوۆا