شارلاپايەۆ ۋتيل الىمىنا قارسى تالقىلاۋ جايىندا: بىزگە شوۋ كەرەك ەمەس
استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ ۋتيل الىمىنا قارسى ونلاين پەتيتسيا تالاپتارىن تالقىلاۋعا ارنالعان جۇمىس توبى جايىندا پىكىر ءبىلدىردى.
«اتالعان پەتيتسيا بويىنشا سوڭعى شەشىم شىعارۋعا ءالى ەرتەرەك. سەبەبى جۇمىس توبىنىڭ وتىرىسى ءوتۋى كەرەك. الايدا جۇمىس توبىنىڭ ءبىرىنشى وتىرىسى وتپەي قالدى. پەتيتسيانى جازعان ادامدار مينيسترلىككە كىرە الماعان ەدى، ياعني عيماراتقا تەلەفونمەن كىرۋگە بولمايدى. بۇگىن جۇمىس توبىنىڭ وتىرىسىن وتكىزەمىز»، - دەدى قانات شارلاپايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
بۇل تۇرعىدا تىلشىلەر اتالعان جۇمىس توبىنىڭ وتىرىسىن ەل حالقى كۇتىپ وتىرعانىن ايتا كەلە، تەلەفون كىرگىزۋ مۇمكىندىگى تۋرالى سۇرادى.
«مەنىڭ ويىمشا، قازىر ناقتى ديالوگ كەرەك، ياعني شوۋ قاجەت ەمەس. مىنا جۇمىستى شوۋ ءۇشىن جاسايمىز با؟ ! جالپى، اتالعان وتىرىستا بەينەجازبا جاسالادى. وندا جازىلعان ۆيدەونى تولىقتاي كەيىننەن بەرەمىز. پەتيتسيانى زاڭ اياسىندا تالقىلاۋىمىز كەرەك جانە ونى تالقىلاۋعا مۇمكىندىك جاسالىپ وتىر. وسى جۇمىس توبىندا جازىلعان ۆيدەونى تولىق نۇسقادا پەتيتسيانى جازعان ادامدارعا بەرەمىز»، - دەدى مينيستر.
ەسكە سالا كەتەيىك، تاياۋدا ۋتيل الىمىنا قارسى پەتيتسيا 50 مىڭ قول جينادى، ەندى ونى ۇكىمەت قاراۋى كەرەك.
بيىل 6-ماۋسىمدا ۋتيل الىمى تۋرالى پەتيتسيانى قارايتىن جۇمىس توبىنىڭ وتىرىسى وتۋگە ءتيىس ەدى. الايدا جيىنعا بەلسەندىلەردى تەلەفونمەن كىرگىزبەي قويعان.
