ۇشاقتىڭ اپاتتىق ەسىگىن اشىپ جىبەرگەن الماتىلىق جىگىت جاۋاپقا تارتىلدى

اۋە كەمەسىنىڭ اپاتتىق ەسىگىن اشقان ەر ادام اكىمشىلىك جاۋاپكەرشىلىككە تارتىلدى، - دەپ حابارلايدى Polisia.kz.

23- جەلتوقساندا Fly Arystan اۋە كومپانياسى وكىلدەرىنىڭ ءوتىنىشى بويىنشا الماتى قالاسى اۋەجايىنداعى جەلىلىك پوليتسيا ءبولىمىنىڭ قىزمەتكەرلەرى شىمكەنت - الماتى باعىتىنداعى رەيس جولاۋشىسىن انىقتاپ، ۇستادى. قۇقىق بۇزۋشى اكت بويىنشا رەيستەن ءتۇسىرىلدى.

تەكسەرۋ بارىسىندا ۇشاق بورتىنداعى قاۋىپسىزدىك ەرەجەلەرىنە باعىنباعان الماتى قالاسىنىڭ 29 جاستاعى ماس تۇرعىنى انىقتالدى. مەديتسينالىق كۋالاندىرۋ قورىتىندىسىنا سايكەس، ول «ورتاشا دارەجەلى» ماس كۇيدە بولعان. قۇقىق بۇزۋشىعا قاتىستى پوليتسيا قىزمەتكەرلەرى ق ر ا ق ب ت ك- ءنىڭ 440-بابى 1-بولىگى، 566-بابى 1-بولىگى، 434-بابى 1-بولىگى بويىنشا بىردەن ءۇش اكىمشىلىك حاتتاما تولتىرىپ، 8 ا ە ك كولەمىندە ايىپپۇل سالدى.

ۇساق بۇزاقىلىق بويىنشا ءىس شەشىم قابىلداۋ ءۇشىن الماتى قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنا جولداناتىن بولادى. اتالعان باپ بويىنشا قۇقىق بۇزۋشى 15 تاۋلىككە دەيىنگى اكىمشىلىك قاماۋعا الۋ تۇرىندە جازالانۋى مۇمكىن.