ۇشاقتا ەلەكتروندى تەمەكى شەككەن جاس ءوسپىرىمنىڭ اتا-اناسىنا ايىپپۇل سالىندى
اۋە كەمەسىنىڭ بورتىندا تەمەكى شەككەن كامەلەتكە تولماعان جولاۋشى قىزدىڭ زاڭدى وكىلىنە ايىپپۇل سالىندى. Kazinform بۇل تۋرالى Polisia.kz كە سىلتەمە جاساپ حابارلايدى.
SCAT اۋەكومپانياسىنىڭ اتىراۋ - تاراز باعىتىنداعى رەيسى ۇشىپ كەلگەننەن كەيىن تاراز قالاسى اۋەجايىنداعى جەلىلىك پوليتسيا بولىمشەسىنىڭ قىزمەتكەرلەرى اكت بويىنشا قۇقىق بۇزۋشىنى ءتۇسىرىپ الدى.
پوليتسەيلەر تەكسەرۋ بارىسىندا ۇشاق سالونىندا ەلەكتروندى تەمەكى شەككەن جولاۋشىنىڭ اتىراۋ قالاسىنىڭ 15 جاستاعى تۇرعىنى ەكەنىن انىقتاپ، كامەلەتكە تولماعان جولاۋشىمەن پروفيلاكتيكالىق اڭگىمە جۇرگىزدى. ساقشىلار وعان تەمەكى شەگۋدىڭ، الكوگولدى ىشىمدىك ءىشۋدىڭ جانە باسقا دا قاۋىپتى پسيحوتروپتىق زاتتاردىڭ دەنساۋلىققا زيان ەكەنى تۋرالى ايتتى. سونداي-اق ۇشاق بورتىندا قاۋىپسىزدىك ەرەجەلەرىن ساقتاۋ كەرەكتىگىن ءتۇسىندىردى.
بۇدان بولەك، قىزدىڭ اتا-اناسىنا ق ر ا ق ب ت ك-نىڭ 127-بابىنىڭ 1-بولىگىمەن اكىمشىلىك حاتتاما تولتىرىلىپ، 10 ا ە ك (36920 تەڭگە) كولەمىندە اكىمشىلىك ايىپپۇل سالىندى.
