ۇشاقتا الكوگول ىشۋگە بولا ما؟ قازاقستاندىق اۋە كومپانيالارىنىڭ ەرەجەسى
استانا. KAZINFORM — ۇشاق بورتىندا الكوگول ىشۋگە بولا ما؟ قازاقستاندىق اۋە كومپانيالار جاۋاپ بەردى، - دەپ حابارلايدى Tengri Travel.
SCAT
باسپا ءسوز قىزمەتىنىڭ ايتۋىنشا، اۋە كومپانيانىڭ بورتىندا جولاۋشىلارعا ۇشۋ ۇزاقتىعىنا بايلانىستى سۋسىندار بەرىلەدى.
«اۆياكومپانيانىڭ بارلىق حالىقارالىق رەيستەرىندە جولاۋشىلارعا تولىققاندى ءمازىر، سونىڭ ىشىندە تاڭداۋعا بولاتىن ىستىق تاعامدار ۇسىنىلادى. سونداي-اق سالقىن جانە ىستىق سۋسىنداردىڭ ءارتۇرلى اسسورتيمەنتى. سونىمەن قاتار اۆياكومپانيانىڭ بارلىق رەيستەرىندە جولاۋشىلار كومپانيانىڭ بورتتىق جۋرنالدارىندا قولجەتىمدى اقىلى مازىردەن تاعامدار، سۋسىندار، الكوگول جانە ىستىق تاعامداردى ساتىپ الۋ مۇمكىندىگىنە يە. SCAT اۋە كومپانياسىنىڭ بورتىندا حالىقارالىق قاۋىپسىزدىك نورمالارىنا سايكەس تەمەكى شەگۋگە، سونداي-اق وزىمەن بىرگە اكەلىنگەن الكوگولدى ىشۋگە قاتاڭ تىيىم سالىنادى»، - دەدى باسپا ءسوز قىزمەتى.
FlyArystan
باسپا ءسوز قىزمەتى كومپانيا بورتتاعى الكوگولدى تۇتىنۋدى قاۋىپسىزدىك ەرەجەلەرىنە جانە جولاۋشىلاردىڭ دەنساۋلىعى مەن جايلىلىعىنا قاتىستى قاتاڭ تۇردە رەتتەيتىنىن حابارلادى.
«بورتتا جولاۋشىلارعا بورتسەرىكتەر قىزمەت كورسەتكەن كەزدە تىكەلەي ۇشاق بورتىندا ساتىپ الىنعان الكوگولدىك سۋسىنداردى عانا تۇتىنۋعا رۇقسات ەتىلەدى. وزىمەن بىرگە اكەلىنگەن الكوگولدىك ىشىمدىكتەردى، سونىڭ ىشىندە باجسىز دۇكەندەردەگى تاۋارلاردى تۇتىنۋعا قاتاڭ تىيىم سالىنادى»، - دەلىنگەن كومپانيانىڭ جاۋابىندا.
اۆياكومپانيانىڭ ستيۋاردەسسالارى بورتتاعى الكوگولدى ساتۋ مەن تۇتىنۋدى باقىلايدى.
«ەگەر جولاۋشى قاۋىپسىزدىككە قاۋىپ توندىرەتىن ماس بولۋ نەمەسە اگرەسسيۆتى مىنەز-قۇلىق بەلگىلەرىن كورسەتسە، ەكيپاج الكوگولدى ساتۋدان باس تارتۋعا قۇقىلى. سونداي-اق قىسىم مەن اۋا رايىنا بايلانىستى ەكيپاج ۇسىنىلاتىن سۋسىنداردىڭ سانىن شەكتەي الادى»، - دەپ اتاپ ءوتتى باسپا ءسوز قىزمەتى.
كومپانيا سونىمەن قاتار جولاۋشىلاردى بەلگىلەنگەن ەرەجەلەردى قۇرمەتتەۋگە جانە ەكيپاجدىڭ ۇسىنىستارىن ورىنداۋعا شاقىردى.
Qazaq Air
كومپانيانىڭ باسپا ءسوز قىزمەتى الكوگولدىك سۋسىندارعا ۇشاق بورتىندا ءمازىر بويىنشا تاپسىرىس بەرۋگە جانە ونىمدەردى قولما-قول اقشاسىز تولەۋگە بولاتىنىن حابارلادى.
«ايتا كەتۋ كەرەك، الكوگولدىك ىشىمدىكتەردى، سونىڭ ىشىندە باجسىز دۇكەندەردە ساتىپ الىنعان سۋسىنداردى كومپانيانىڭ ۇشاقتارىندا پايدالانۋعا تىيىم سالىنادى»، - دەلىنگەن حابارلامادا.
Air Astana
كومپانيانىڭ باسپا ءسوز قىزمەتى ۇشاقتا ۇشۋ كەزىندە الكوگولدى ىشۋگە بولا ما دەگەن سۇراققا جاۋاپ بەردى.
«بورتتا جولاۋشىلارعا قىزمەت كورسەتۋ كلاسىنا بايلانىستى ءارتۇرلى سۋسىندار ۇسىنىلادى. ءدىني جانە مادەني شەكتەۋلەرى بار مارشرۋتتاردا الكوگول بەرىلمەيدى. سونىمەن قاتار تاڭعى اس كەزىندە بار قىزمەتى سۇرانىس بويىنشا ۇسىنىلادى. حالىقارالىق قاۋىپسىزدىك ستاندارتتارىنا سايكەس بورتتا وزىڭمەن بىرگە اكەلىنگەن الكوگولدى تۇتىنۋعا قاتاڭ تىيىم سالىنادى»، - دەپ حابارلادى كومپانيا.
جالپى ۇشاقتا الكوگول ىشپەگەن دۇرىس. مۇنىڭ بىرنەشە ماڭىزدى سەبەپتەرى بار:
جىلدام ماس بولۋ. شامامەن 10 مىڭ مەتر بيىكتىكتە ۇشاق سالونىنداعى قىسىم تەڭىز دەڭگەيىنەن تومەن بولادى، ال وعان قوسا اۋاداعى وتتەگى دەڭگەيى تومەندەيدى. ول الكوگولدىڭ قانعا تەز ەنۋىنە اكەلەدى، بۇل ونىڭ اسەرىن كۇشەيتەدى. الكوگولدى از ىشسەڭىز دە، تەز ماسايۋعا اكەلۋى مۇمكىن؛
سۋسىزدانۋ. ۇشاقپەن ۇشۋدىڭ ءوزى سالونداعى قۇرعاق اۋانىڭ اسەرىنەن سۋسىزدانۋعا ىقپال ەتەدى. الكوگول بۇل اسەردى ودان ءارى كۇشەيتەدى، ويتكەنى ول نەسەپ ايداعىش اسەرگە يە. بۇل ۇشۋدان كەيىن باس اۋرۋىنا، شارشاۋعا جانە حال-جاعدايدىڭ ناشارلاۋىنا اكەلۋى مۇمكىن؛
شارشاڭقىلىق. الكوگول جۇيكە جۇيەسىن باسادى، بۇل ۇيقىشىلدىق پەن شارشاۋ سەزىمىن ارتتىرادى؛
كوگنيتيۆتى فۋنكتسيالاردىڭ ناشارلاۋى. بيىكتىكتە مي از وتتەگىن الادى، بۇل نازار قويۋ مەن رەاكتسياعا تەرىس اسەر ەتۋى مۇمكىن. الكوگول بۇل اسەردى كۇشەيتەدى.
