ۇشاققا دومبىرامەن مىنەردە نەنى ەسكەرۋ كەرەك

рукоделие Домбра қолөнер домбыра
فوتو: ماقسات شاعىربايەۆ/ Kazinform

استانا. KAZINFORM - كولىك ءمينيسترى مارات قارابايەۆ ۇشاققا مۋزىكالىق اسپاپپەن ەسكەرتۋسىز كەلىپ، كەيىننەن داۋ شىعاراتىن تانىمال تۇلعالارعا رەنىشىن ءبىلدىردى. سونداي-اق، مۋزىكالىق اسپاپپەن جول ءجۇرۋ قاعيداسىن ءتۇسىندىردى.

ۇكىمەتتە وتكەن بريفينگتە تىلشىلەر ۇلتتىق اسپاپتىڭ ۇشاق بورتىنا سىيمايتىنىن، جۇك بولىگىندە جوعالىپ كەتەتىنىن ايتىپ، بۇل ماسەلەنى شەشۋ جولدارىن سۇرادى.

ءوز كەزەگىندە كولىك ءمينيسترى قانداي اسپاپ بولاتىنىن، ونىڭ ولشەمدەرىن الدىن-الا ەسكەرۋ قاجەتتىگىن ايتۋدا.

«مۋزىكالىق اسپاپتى قولدا ۇستاپ وتىرۋعا بولمايدى، بۇل قاۋىپسىزدىك ەرەجەسىنە ساي كەلمەيدى. ۇستىڭگى جۇك سالعىشقا دا كەيدە سىيماي قالۋى مۇمكىن. ويتكەنى، ەلىمىزدەگى ۇشاقتىڭ گاباريتى الۋان ءتۇرلى - بومباردير-190، بوينگ-737، ەيرباس-320 بولۋى مۇمكىن. سوندىقتان جولاۋشى بيلەت الاردا نەمەسە كومپانياعا حابارلاسىپ، مۋزىكالىق اسپاپپەن ۇشاتىنىن ەسكەرتىپ، مالىمەتتى ناقتىلاۋى كەرەك. وزىمەن بىرگە الا كىرەتىن مۇمكىندىگى بولماسا، كومپانيا قوسىمشا ورىن ساتىپ الۋعا كەڭەس بەرەر ەدى. ماسەلەنىڭ ءبارى وسىندا»، - دەپ جاۋاپ بەردى م. قارابايەۆ.

مينيستر كەي جۇلدىزداردىڭ ماسەلەنىڭ بايىبىنا بارماي، ۇشار الدىندا داۋ شىعارىپ، ۆيدەوعا تۇسىرەتىنىنە قىنجىلدى.

«جانۋارمەن بىرگە ساپارلايتىندار دا جاعدايىن الدىن الا ەسكەرتەدى. سول سەكىلدى مۋزىكالىق اسپاپتى دا الدىن الا ايتسا، ۇشاق كولەمىن ناقتىلاپ السا، ەش ماسەلە تۋىنداماس ەدى»، - دەدى سپيكەر.

اۆتور
ايجان سەرىكجان قىزى

سوڭعى جاڭالىقتار