ۇشاق بيلەتتەرىنىڭ باعاسى نەگە قىمبات: الماتى اۋەجايىنىڭ پرەزيدەنتى مالىمدەمە جاسادى
الماتى. KAZINFORM - الماتى حالىقارالىق اۋەجايىنىڭ پرەزيدەنتى گوكەر كوسە ۇشاق بيلەتتەرىنىڭ قىمباتتىعىنا اۋەجاي جاۋاپتى ەمەس ەكەنىن ايتتى.

الەۋمەتتىك جەلىلەردە اۋەجاي قىزمەتتەرى ۇشاق بيلەتتەرىنىڭ قۇنىنا ايتارلىقتاي اسەر ەتەتىنى تۋرالى اقپارات تارادى.
گوكەر كوسە اۋەجايلاردىڭ جوعارى بيلەت باعاسىنىڭ قالىپتاسۋىنا قاتىسپايتىنىن جەتكىزدى.
ايتۋىنشا، الەم بويىنشا اۋەجاي الىمدارى اۋەكومپانيالاردىڭ جالپى شىعىندارىنىڭ تەك 4 پايىزى عانا. قازاقستاننىڭ ىشكى اۆياكومپانيالارى ازياداعى ەڭ تومەن اۋەجايلىق الىمداردىڭ ءبىرىن پايدالانادى، بۇل ەلدىڭ اۆياتسيالىق سەكتورى ءۇشىن ايتارلىقتاي باسەكەلەستىك ارتىقشىلىق. بۇدان باسقا، ولار ءۇشىن جەرگىلىكتى اۆياتسيالىق وتىن تومەن باعادا تىكەلەي قول جەتىمدى.
- الماتى اۋەجايى ۇشاق بيلەتتەرىنىڭ جوعارى باعاسىنا جاۋاپتى دەگەن تۇجىرىمدى جوققا شىعارادى. شىن مانىندە، اۋەجايلار ۇشىرايتىن ەكونوميكالىق قيىندىقتاردى ەسكەرەر بولساق، جىلدار بويى ينفراقۇرىلىمعا ينۆەستيتسيالار از سالىندى. بۇل ءوز كەزەگىندە وبەكتىلەر مەن قىزمەتتەردى دامىتۋ مەن جاڭعىرتۋدى قيىنداتادى. دەگەنمەن، ءبىز جولاۋشىلار ءۇشىن قاۋىپسىزدىك پەن جايلىلىقتىڭ جوعارى دەڭگەيىن قامتاماسىز ەتۋدى جالعاستىرامىز، - دەدى ول.
سونىمەن قاتار، ول اۆياتسيالىق وتىن كومپانيالار شىعىندارىنىڭ ەداۋىر بولىگىن قۇرايتىنىن جانە بۇل قۇبىلىس بۇكىل الەم بويىنشا بارلىق اۋەتاسىمالداۋشىعا ءتان ەكەنىن اتاپ ءوتتى.
- الايدا، اۋەكومپانيالار شىعىنداردى باسقارۋدىڭ ءتۇرلى تەتىكتەرىن پايدالانا وتىرىپ، بيلەتتەردىڭ باعاسىن وڭتايلاندىرا الادى. بۇل رەتتە اۋەجايلاردىڭ قارجىلىق جاعدايىنىڭ ناشارلاۋى اۆياكومپانيالار ءۇشىن دە، سوڭعى جولاۋشىلار ءۇشىن دە جاعدايدى جاقسارتۋعا ىقپال ەتپەيدى، - دەپ ءتۇسىندىردى گوكەر كوسە.
سونىمەن قاتار، ول بارلىق مۇددەلى تاراپتى، سونىڭ ىشىندە مەملەكەتتىك مەكەمەلەردى سالاداعى جاعدايدى جاقسارتۋ ءۇشىن شەشىمدەر ىزدەۋگە شاقىردى.
وسىعان دەيىن ەنەرگەتيكا ءمينيسترى ۇشاق بيلەتىنىڭ باعاسىن اۋەجايلار قىمباتتاتىپ وتىرعانىن ايتقان ەدى.