ۇشاق اپاتىنان قازا تاپقانداردى تۇرىنەن تانۋ مۇمكىن بولمادى - اقتاۋلىق كريميناليست
اقتاۋ. KAZINFORM - ماڭعىستاۋ وبلىستىق پوليتسيا دەپارتامەنتى جەدەل كريميناليستيكا باسقارماسىنىڭ كريميناليسى ايبەك الىبايەۆ ۇشاق اپاتىنان قازا تاپقانداردىڭ مۇردەسىن تانىتۋ توبىندا جۇمىس ىستەگەن. ول 38 ادامنىڭ مۇردەسىن تۋىستارىنا تانىتۋ وڭاي بولماعانىن ايتادى.
- قازا تاپقان 38 ادامنىڭ تۋىستارى ءار ەلدەن كەلىپ، تانىتۋ جۇمىستارى جۇرگىزىلدى. تۇرلەرىنەن انىقتاۋ مۇمكىن بولمادى. سوندىقتان تۋىستارىنان سۇراي وتىرىپ، دەنەلەرىندەگى ەرەكشە بەلگىلەرمەن ىزدەي باستادىق. مەڭىنە، تىرتىعىنا، تاتۋيروۆكاسىنا جانە التىن تىسىنە قاراپ تانىدى. تۋىستارىنا دا وتە اۋىر بولدى. تانۋ كەزىندە جۇرەگى شىداماعاندارعا ءبىزدىڭ مەديتسينا ماماندارىمىز كومەك كورسەتتى. ەندى اپات بولماسىن، - دەيدى كريميناليست ايبەك الىبايەۆ.
وبلىستىق پوليتسيا دەپارتامەنتى جەدەل كريميناليستيكا باسقارماسىنىڭ كريميناليسى ايبەك الىبايەۆ پرەزيدەنت جارلىعىمەن باۋىرجان مومىش ۇلى اتىنداعى ەكىنشى دارەجەلى «ايبىن» وردەنىمەن ناگرادتالدى.
بۇگىن اقتاۋدا ۇشاق اپاتى بولعان كەزدە ەرلىك كورسەتكەن تۇرعىندارعا، مەديتسينا ماماندارىنا، ءورت سوندىرۋشىلەر مەن قۇتقارۋشىلارعا بارلىعى - 69 ادامعا پرەزيدەنتتىڭ العىسى جاريالانىپ، مەملەكەتتىك ناگرادالار تابىستالدى.
سولاردىڭ ءبىرى، ءتۇپقاراعان اۋدانى اتاش كەنتىنىڭ تۇرعىنى ەلميرا اكىبايەۆا ەرلىگى ءۇشىن پرەزيدەنتتىڭ العىسىمەن ماراپاتتالدى. ول ۇشاق قۇلاعان كەزدە ارىپتەستەرىمەن اۆتوبۋستا كەتىپ بارا جاتىپ، كولىكتى وقيعا ورنىنا بۇرىپ، قۇلاعان ۇشاققا ءبىرىنشى جەتكەن. جەدەل جاردەم كەلگەنشە جارالانعانداردى اۆتوبۋسقا وتىرعىزىپ، العاشقى كومەك كورسەتكەن.
- قۇلاعان ۇشاقتان جاراقاتتانعان ادامدار شىعىپ جاتتى. ستيۋاردەسسا مەن بورت پروۆودنيككە كومەكتەسىپ، اۆتوبۋسقا وتىرعىزدىق. سوسىن جاراقاتتانعان قىز بالا بولدى. ۇستىندە اق كۇرتەشەسى بار، 8-10 جاس شاماسىندا. سول قىز بالانىڭ ايتقان سوزدەرى ەسىمنەن كەتەر ەمەس. «مەنى قويا بەرىڭىز، ىشتە انام بار، مەنىڭ انامدى قۇتقارىڭىزشى، - دەپ جىلاعان داۋىسى ءالى قۇلاعىمدا. سول كەزدە مەن قىزدى اناڭ ءتىرى دەپ جۇباتۋعا تىرىستىم. بالاعا پسيحولوگيالىق كومەك كورسەتتىم، - دەيدى ەلميرا اكىبايەۆا.
بۇعان دەيىن، اقتاۋدا Azerbaijan Airlines ۇشاعى اپاتقا ۇشىراعانى تۋرالى جازعان بولاتىنبىز.
