ۇشاق اپاتىنان قايتىس بولعان ازاماتتاردىڭ تۋىستارىنا قارجىلاي كومەك كورسەتىلدى

استانا. KAZINFORM - اقتاۋ ماڭىنداعى ۇشاق اپاتىنان قايتىس بولعاندار مەن زارداپ شەككەن ازاماتتاردى الىپ كەتۋگە كەلگەن تۋىستارىنا ماڭعىستاۋ وبلىسى تاراپىنان بارلىق قولداۋ شارالارى كورسەتىلىپ جاتىر.

وبلىس اكىمدىگى باسپا ءسوز قىزمەتىنىڭ مالىمەتىنشە، دارىگەرلەر مەن توتەنشە جاعداي قىزمەتكەرلەرى، اكىمدىك وكىلدەرى مەن ۆولونتەرلار كۇشەيتىلگەن رەجيمدە جۇمىس ىستەپ جاتىر.

تۋىستارىن الىپ كەتۋگە كەلگەن شەتەل ازاماتتارىن اۋەجايدان كۇتىپ الىپ-شىعارىپ سالۋ، قوناق ۇيگە ورنالاستىرۋ جانە ت. ب. قولداۋ كورسەتىلىپ جاتىر. اتاپ ايتقاندا، وڭىرلىك پسيحولوگتار مەن دارىگەرلەر وبلىستىق اۋرۋحانادا قايعىرىپ جۇرگەن جانداردىڭ دەنساۋلىعىن تەكسەرىپ، پسيحولوگيالىق كومەك بەرىپ جاتىر. سونداي-اق، ىستىق تاماق پەن شايمەن قامتاماسىز ەتىلدى.

سونىمەن قاتار، ۇشاق اپاتىنان كوز جۇمعان ماڭعىستاۋ وبلىسىنىڭ 3 ازاماتىنىڭ وتباسىنا قارجىلاي كومەك بەرىلىپ، مارقۇمداردى جەرلەۋ راسىمدەرىنە قولداۋ كورسەتىلدى.

ازەربايجاننىڭ دەنساۋلىق ساقتاۋ ءمينيسترى قازاقستان دارىگەرلەرىنە العىس ايتقان بولاتىن.

ەسكە سالا كەتەيىك، اقتاۋ ماڭىندا باكۋدەن گروزنىيعا باعىت العان ۇشاق اپاتقا ۇشىرادى.

ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاپتى.