ۇشاق اپاتىن تەرگەۋ قازاقستان قۇزىرەتىندە بولادى - قانات بوزىمبايەۆ

اقتاۋ. KAZINFORM - ۇكىمەت باسشىسىنىڭ ورىنباسارى قانات بوزىمبايەۆ اقتاۋ ماڭىنداعى اۋە اپاتىن تەرگەۋ جۇمىستارى قازاقستان يۋريسديكتسياسىندا ەكەنىن جانە باس پروكۋروردىڭ قاتاڭ باقىلاۋىندا بولاتىنىن ايتتى.

- بارلىق تەرگەۋ قازاقستان رەسپۋبليكاسىنىڭ يۋريسديكسياسىندا بولادى. اۋە اپاتى قازاقستان رەسپۋبليكاسىندا بولدى، بارلىق تەرگەۋ باس پروكۋروردىڭ قاتاڭ باقىلاۋىندا. بۇل تۋرالى مەملەكەت باسشىسى ءتيىستى تاپسىرمالار بەردى، - دەدى ق. بوزىمبايەۆ اقتاۋ قالاسىندا وتكەن باسپا ءسوز ءماسليحاتىندا.

قازىرگى ۋاقىتتا تەرگەۋ قر قىلمىستىق كودەكسىنىڭ 344-بابىنىڭ 3-بولىگى - «كولىك قۇرالدارىن پايدالانۋ قاۋىپسىزدىگى ەرەجەلەرىن بۇزۋ، ادامداردىڭ ولىمىنە اكەلۋ» بابى بويىنشا جۇرگىزىلۋدە.
وقيعا ورنىندا تەرگەۋشىلەر، كريميناليستەر جانە اۆياتسيا سالاسىنىڭ ماماندارى جۇمىس ىستەپ جاتىر. كۋاگەرلەردەن جاۋاپ الىنىپ، قاجەتتى ساراپتامالار تاعايىندالۋدا.

- جەدەل-تەرگەۋ توبى تاراپىنان قاجەتتى ءىس-شارالار جۇرگىزىلۋدە. بىرىنشىدەن، وقيعا ورنىن قورعاۋ قامتاماسىز ەتىلدى، بارلىق قاجەتتى ساراپتامالار تاعايىندالدى. قازىر ىشكى ىستەر ورگاندارىنىڭ قىزمەتكەرلەرى جۇمىس ىستەپ جاتىر، - دەيدى ىشكى ىستەر ۆيتسە-ءمينيسترى سانجار ءادىلوۆ.

ەسكە سالساق، بۇعان دەيىن اپاتقا ۇشىراعان AZAL ۇشاعى ەكى اي بۇرىن تەحنيكالىق تەكسەرۋدەن وتكەنى ءمالىم بولدى.

اۆتور

ايجان سەرىكجان قىزى