ۇشاق اپاتى كەزىندە وقيعا ورنىنا ەڭ ءبىرىنشى جەتكەن اقتاۋلىق اسكەري قىزمەتكەر سول ساتتەگى اسەرىمەن ءبولىستى

استانا. KAZINFORM - اقتاۋ ماڭىندا بولعان ۇشاق اپاتى كەزىندە ەڭ العاشقى بولىپ وقيعا ورنىنا جەتىپ، اۋە كەمەسىنىڭ ەسىگىن اشىپ، قۇتقارۋ جۇمىستارىنا اتسالىسقان ازامات - ق ر اۋە قورعانىس كۇشتەرى اۆياتسيالىق بازاسىنىڭ اسكەري قىزمەتكەرى نۇرلان بوتاعارين، دەپ جازادى otpannews.kz.

ۇشاق اپاتى بولعان ماڭايدا اۋە قورعانىس كۇشتەرى اۆياتسيالىق بازاسىنىڭ ستانتسياسى ورنالاسقان. نۇرلان بوتاعارين 30153 اسكەري ءبولىمىنىڭ كەلىسىم- شارت بويىنشا اسكەري قىزمەتشىسى رەتىندە سول كۇنى كەزەكشىلىك جۇمىسىندا بولعان. ۇشاقتىڭ قۇلاعانىن كورگەندە جۇمىس ورنىنا ارىپتەسىن قالدىرىپ، ءوزى ەش ويلانباستان قۇلاعان ۇشاققا قاراي جۇگىرگەن.

- اۋەدەگى ۇشاقتىڭ قونا الماي جۇرگەنىن بايقاعاننان كەيىن، كوز الماي قاراپ تۇردىم. وقيعا ورىن العان كەزدە دەرەۋ كولىگىمە وتىرىپ، ۇشاققا قاراي بەتتەدىم. العاشقىدا 10 شاقتى ادامى بار كىشكەنتاي ۇشاق شىعار دەپ ويلادىم. ءبىراق ادام كوپ ەكەن. الدىمنان اق كويلەكتى، ءۇستى باسى قان- قان بولعان كىشكەنتاي قىز شىقتى. راسىندا مۇنداي اۋىر جاعدايلاردى، بولىنگەن دەنە مۇشەلەرىن، جۇرەگىڭ اۋىراتىن قيىن ءساتتى كورمەگەننەن كەيىن، شوشىپ تا كەتتىم. ارتقى جاقتاعى ۇشاقتىڭ بولىنگەن تۇسىنداعى ەسىكتى قاتتى تەۋىپ اشىپ قالىپ ەدىم، ار جاقتان شىعا الماي جاتقان ءبىراز ادام بارىن كوردىم. سولاي ءبارىن شىعارۋعا تىرىسىپ جاتقاندا كومەككە ماڭعىستاۋ وڭىرلىك ەلەكتروتوراپتىق كومپانياسى (م و ە ك) قىزمەتكەرلەرى مەن قۇتقارۋشىلاردىڭ كەلىپ جاتقانىن بايقادىم. جەدەل جاردەمنىڭ داۋسى شىعىپ، ولار دا جاقىنداپ قالعانىن ءبىلدىم. سولاي بارىنشا قولىمنان كەلگەن ارەكەتتى جاسادىم، - دەدى قۇتقارۋشى.

29 جاستاعى نۇرلان بوتاعارين اقتاۋ قالاسىنىڭ تۇرعىنى. بورانقۇل اۋىلىنىڭ تۋماسى. بۇگىندە جارى ەكەۋى ەكى قىز تاربيەلەپ وتىر.

نۇرلان بۇل ارەكەتىن اسكەري بورىشى عانا ەمەس، ازاماتتىق پارىزىم دەپ ەسەپتەيدى. جاقسىنىڭ جاقسىلىعىن ايت نۇرى تاسىسىن دەمەكشى، اۋىر اپاتتا ەڭ العاشقى كومەك كورسەتكەن قۇتقارۋشىلارعا العىسىمىز شەكسىز.