ۇشاق اپاتى: ازەربايجان جۇرتى قازاق حالقىنا العىس ايتىپ جاتىر
استانا. KAZINFORM - بىرەر كۇن بۇرىن اقتاۋ ماڭىندا ازەربايجان ۇشاعى اپاتقا ۇشىرادى. اۋە بورتىندا بىرنەشە ەلدىڭ ازاماتتارى بولدى، ونىڭ ىشىندە قازاقستاندىقتار دا بار.
وكىنىشكە قاراي، اۋە اپاتىنان مەرت بولعاندار بار، بورتتا بولعان بارلىق قازاقستان ازاماتى قايتىس بولدى. اپاتتان امان قالعان جاندارعا ءبىزدىڭ دارىگەرلەر مەن باسقا دا قۇزىرلى ورگانداردىڭ ماماندارى جان-جاقتى كومەك كورسەتىپ جاتىر.
وسى ورايدا قازاق حالقىنا العىس ايتىپ جاتقان ازەربايجان جانە باسقا دا قاراپايىم ازاماتتاردىڭ جەلىدەگى پىكىرىن شولىپ وتكەن ەدىك.
- العا، قازاقستان! تۋدى كورىپ تۇرسىزدار ما؟ بۇل ءبىزدىڭ اۋە بورتىن قابىلداعان ۇلى قازاقستاننىڭ تۋى. ۇشاقتاعى اپاتتان مەرت بولعان بارشا قازاققا كوڭىل ايتامىن. اۋە بورتىن قابىلداعانى ءۇشىن، دەر كەزىندە قولىن ۇشىن سوزىپ كومەك كورسەتكەنى ءۇشىن ۇلى قازاق حالقىنا شىن جۇرەكتەن العىس ايتامىن. قازاقستاندىقتار قان تاپسىردى، توتەنشە جاعدايلار مينيسترلىگى شۇعىل ارەكەت ەتتى، قايعى شەككەن جاندار ازەربايجان ەلشىلىگىنىڭ الدىنا گۇل شوقتارىن قويدى. ءسىز ۇلى حالىقسىز، كوپ راقمەت! سىزدەر ءبىزدىڭ باۋىرسىزدار، العا قازاقستان، العا تۇران!
شىنىمدى ايتام، باسىمدى يەمىن. قيىن ساتتە قاسىمىزدان تابىلىپ، باۋىر رەتىندە قول ۇشىن سوزدىڭىزدار، مىڭ العىس، - دەپ ازەربايجان ازاماتى ۆيدەو ارقىلى العىس ايتتى.
الەۋمەتتىك جەلىدە وسى سەكىلدى پىكىر جازىپ جاتقان جاندار بارشىلىق.
- مەن قازاقستاندى سۇيەمىن! ۇلتىم - شەشەن. وسىندا تۋىپ- ءوستىم، تۇرىپ جاتىرمىن. مەن قۇدايدىڭ قازاق جەرىندە جاراتقانىنا قۋانىشتىمىن. بۇل جەردە كەرەمەت جاندار. قازاق قيىن ساتتە ۇنەمى قول ۇشىن سوزاتىنىن ءومىر كورسەتىپ وتىر. اقتاۋداعى قايعىلى ساتتە جاقىن ماڭداعى ەلەكتريكتەر، دارىگەرلەر مەن باسقا دا بەي- جاي قاراماعان جاندار دەرەۋ كومەگىن كورسەتىپ، ادام ءومىرىن قۇتقارۋعا اتسالىستى. بەيبىتشىلىك بولسىن!، - دەپ جازدى وتانداسىمىز جەلىدە.
- راقمەت، قازاقستان! جۇزدەگەن ليتر قان تاپسىرىپ، قيىن ساتتە قولداۋ كورسەتكەندەرىڭىز ءۇشىن شىن جۇرەكتەن العىس، - دەگەن پىكىر قالدىرعان لەيلا ناسىروۆا ەسىمدى جەلى قولدانۋشىسى.
- قازاقستان باۋىرىما باسىمدى يەمىن. باۋىر قيىن ساتتە تانيدى. ءبىزدىڭ جاقىن جانداردى قۇتقارعاندارىڭىز، جەدەل ارەكەت ءۇشىن راقمەت!، - دەگەن پىكىر قالدىرىپتى جەلىدە.
- قازاق حالقى اقتاۋ ماڭىنداعى ۇشاق اپاتىنان امان قالعان جاندارعا كومەك رەتىندە قان تاپسىرۋعا كەزەكتە تۇر. سىزدەرگە راقمەت! - دەيدى گاميد گاميدوۆ ەسىمدى ازامات.
