ۇشاق اپاتى. Azerbaijan Airlines قازا تاپقان وتباسىلارعا قانشا وتەماقى تولەيدى
استانا. قازاقپارات - Azerbaijan Airlines اۋەكومپانياسى اقتاۋ ماڭىنداعى اۋە اپاتىنان زارداپ شەككەندەر مەن قازا تاپقان جانداردىڭ وتباسىنا وتەماقى تولەيدى.
- ازەربايجان اۋەكومپانيالارى جابىق اكتسيونەرلىك قوعامى باقىلاۋ كەڭەسىنىڭ شەشىمى بويىنشا قازاقستان رەسپۋبليكاسىنىڭ اۋماعىندا 2024 -جىلعى 25 - جەلتوقساندا اپاتقا ۇشىراعان باكۋ- گروزنىي J2-8243 رەيسىن ورىنداعان Embraer 190 ۇشاق اپاتىندا زارداپ شەككەن جولاۋشىلاردىڭ ءارقايسىسىنا 20000 مانات (شامامەن 5 ميلليون تەڭگەدەن استام)، ال قازا تاپقان جانداردىڭ وتباسىنا 40000 مانات مولشەرىندە وتەماقى تاعايىندالدى (شامامەن 11 ميلليون تەڭگەدەن استام)، - دەلىنگەن اۋەكومپانيانىڭ حابارلاماسىندا.
سونىمەن قاتار، بارلىق جولاۋشى ازەربايجان رەسپۋبليكاسىنىڭ زاڭناماسىنا جانە وزىق حالىقارالىق تاجىريبەگە سايكەس قولدانىلاتىن ءتيىستى ساقتاندىرۋ تولەمىن الادى.
بۇعان دەيىن اقتاۋ ماڭىنداعى ۇشاق اپاتىنان قايتىس بولعان قازاقستاندىقتاردىڭ وتباسىنا مەملەكەتتىك قارجىلاي قولداۋ كورسەتىلەتىنى تۋرالى حابارلاعان ەدىك.
