شامادان تىس كرەديت العاندارعا ارنالعان كەڭسەلەر اشىلىپ جاتىر

اقشا
Kazinform

 استانا. قازاقپارات - ەلىمىزدە نەسيە الىپ تولەي الماي جۇرگەن ازاماتتارعا كەڭەس بەرەتىن ارنايى كەڭسە جۇمىس ىستەي باستايدى. بۇل تۋرالى قارجى ءمينيسترى ەرۇلان جاماۋبايەۆ ءمالىم ەتتى. 

«قارىزسىز قوعام» جوباسى اياسىندا ارنايى جول كارتاسى ازىرلەنىپ، بەكىتىلدى. ول 6 نەگىزگى باعىت بويىنشا 25 ءىس- شارانى قامتيدى. جول كارتاسىنىڭ ءاربىر باعىتى بويىنشا جۇمىستى ۇيلەستىرۋ ءۇشىن اكىمدىكتەردە جاۋاپتى لاۋازىمدى تۇلعالار بەكىتىلدى. رەسپۋبليكالىق ماڭىزى بار 3 قالادا جانە ەلىمىزدىڭ 17 وڭىرىندە حالىقپەن تىكەلەي جۇمىس ىستەيتىن وڭىرلىك جوبالىق كەڭسەلەر قۇرىلىپ جاتىر»، - دەدى ەرۇلان جاماۋبايەۆ ۇكىمەت وتىرىسىندا.

ونىڭ ايتۋىنشا، بۇگىندە حالىقتىڭ شامادان تىس كرەديت الۋى پروبلەماسى وزەكتى.

«جوبالىق وفيستەردىڭ نەگىزگى مىندەتى مەرزىمى وتكەن كرەديتتەردى رەتتەۋ، قارجىلىق الاياقتىقتان قورعاۋ، سونداي- اق، ازاماتتاردىڭ بانكروتتىق ماسەلەلەرىن شەشۋگە، جۇمىسقا ورنالاستىرۋعا جاردەمدەسۋ جانە بيزنەستى قولداۋ شارالارىن ۇيىمداستىرۋ. اكىمدىكتەر جوبالىق وفيستەردىڭ جۇمىسى ءۇشىن قاجەتتى عيماراتتار مەن ماتەريالدىق- تەحنيكالىق بازالاردى بولەدى. وعان بانكتەر قارجىلىق جاعىنان ىقپالداساتىن بولادى. جوبانىڭ تاعى ءبىر ماڭىزدى باعىتى - ازاماتتاردىڭ، وقۋشىلار مەن ستۋدەنتتەردىڭ قارجىلىق ساۋاتتىلىعىن ارتتىرۋ»، - دەيدى ول.

سوڭعى جاڭالىقتار