شامادان تىس جۇك تاسىعان كولىكتەرگە ايىپپۇل سالۋ اۆتوماتتاندىرىلادى
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ۇكىمەت وتىرىسىندا جول ساپاسىن ساقتاۋ سالاسىنداعى سيفرلىق شەشىمدەردىڭ قالاي قولدانىسقا ەنگىزىلىپ جاتقانىن ءمالىم ەتتى.

- بۇرىنعى جىلدارى شامادان تىس جۇكتەلگەن ماشينا سالماق سەنسورىمەن بەكىتىلىپ، كامەرا بولەك سۋرەتكە ءتۇسىپ، ينسپەكتور قاعاز تۇرىندە حاتتامادا زاڭسىزدىقتى تىركەۋ ءۇشىن ماشينالار توقتاتىلاتىن. بيىل ادامي فاكتوردى الىپ تاستاۋ جوسپارلانۋدا جانە حاتتامالار اۆتوماتتى تۇردە رەسىمدەلەدى. ول ءۇشىن اكىمشىلىك كودەكسكە وزگەرىستەر ەنگىزىلىپ، ينتەگراتسيالىق جۇمىستار جۇرگىزىلىپ جاتىر، - دەدى مينيستر.
ونىڭ پايىمداۋىنشا، بۇل جاڭاشىلدىق جول بويىن تورۋىلداعان كولىك ينسپەكتورلارىنىڭ سانىن قىسقارتىپ، سىبايلاس جەمقورلىقتىڭ قۇرامداس تاۋەكەلدەرىن ازايتادى.
- بۇگىنگى تاڭدا Astana Hubقا اۆتوجول جانە كولىك سالاسىندا جۇمىس ىستەيتىن 24 يننوۆاتسيالىق جوبا تىركەلگەن. ولاردىڭ كىرىسى 15 ميلليارد تەڭگە، ەكسپورت 1 ميلليارد تەڭگە بولىپ، 1700-دەن استام جۇمىس ورنى اشىلدى، - دەدى جاسلان ماديەۆ.
بۇعان دەيىن بيىل ەلدەگى اۆتوجولداردىڭ اقىلى ۋچاسكەلەرىندەگى تاريفتەر ورتا ەسەپپەن 30 پايىزعا ءوسۋى جوسپارلانعانى ءمالىم بولعان ەدى.