شالعاي شەكارا ماڭىنداعى اۋدانداردىڭ تۇرعىندارى ءۇشىن ەڭبەك ءوتىلىن ەسەپتەۋدىڭ ەرەكشە نورمالارى ەنگىزىلمەك
استانا. KAZINFORM - ەكسترەمالدى تابيعي-كليماتتىق جاعدايلارى بار شالعاي شەكارا ماڭىنداعى اۋدانداردىڭ تۇرعىندارى ءۇشىن جالاقىعا ۇستەمەاقى جانە ەڭبەك ءوتىلىن ەسەپتەۋدىڭ ەرەكشە نورمالارىن ەنگىزۋ ماسەلەسى پىسىقتالىپ جاتىر.
بۇل تۋرالى سەنات دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.
«مەملەكەت باسشىسىنىڭ تاپسىرماسىنا سايكەس، قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 -جىلدارعا ارنالعان تۇجىرىمداماسىنا شەكارا ماڭىنداعى اۋماقتاردى دامىتۋ جونىندەگى جەكەلەگەن ءبولىمدى ەنگىزۋ بويىنشا وزگەرىستەر مەن تولىقتىرۋلار ەنگىزىلدى. اتاپ ايتقاندا، الەۋمەتتىك جانە ينجەنەرلىك ينفراقۇرىلىمدى دامىتۋ، شەكارا ماڭىنداعى اۋماقتاردىڭ رەسپۋبليكالىق جانە جەرگىلىكتى ماڭىزى بار جولدارىن سالۋ، رەكونسترۋكتسيالاۋ جانە جوندەۋ، شەكارا ماڭىنداعى ەلدى مەكەندەردىڭ تۇرعىندارىنا بيزنەس-باستامالاردى، ونىڭ ىشىندە اۋىل شارۋاشىلىعى سالاسىنداعى باستامالاردى قولداۋعا گرانتتار بەرۋ، ءتۋريزمدى جانە ترانسشەكارالىق تۋريستىك مارشرۋتتاردى دامىتۋ ءۇشىن جاعدايلار جاساۋ جانە تاعى باسقا ءبىرقاتار ءىس- شارا كوزدەلگەن»، - دەدى ولجاس بەكتەنوۆ جاۋابىندا.
ونىڭ اتاپ وتۋىنشە، ەكسترەمالدى تابيعي- كليماتتىق جاعدايلارى بار شالعاي شەكارا ماڭىنداعى اۋدانداردىڭ تۇرعىندارى ءۇشىن جالاقىعا ۇستەمەاقى جانە ەڭبەك ءوتىلىن ەسەپتەۋدىڭ ەرەكشە نورمالارىن ەنگىزۋ ماسەلەسى پىسىقتالىپ جاتىر.
«سونداي-اق اتالعان شەكارالاردا اۆتوموبيل وتكىزۋ پۋنكتتەرىن جايلاستىرۋ، جاڭعىرتۋ جانە تەحنيكالىق جاراقتاندىرۋ بويىنشا جۇمىستار جۇرگىزىلۋدە. «اۋىل - ەل بەسىگى» باعدارلاماسىنىڭ اياسىندا شەكارا ماڭىنداعى اۋىلداردا الەۋمەتتىك جانە ينجەنەرلىك ينفراقۇرىلىمدى دامىتۋعا ەرەكشە كوڭىل بولىنەدى. ماسەلەن، 2019-2023 -جىلدارى رەسپۋبليكالىق بيۋدجەت قاراجاتىنان 108,8 ميلليارد تەڭگە سوماعا الەۋمەتتىك جانە ينجەنەرلىك ينفراقۇرىلىم وبەكتىلەرىن سالۋ، رەكونسترۋكتسيالاۋ جانە جوندەۋ بويىنشا 1795 جوبا ىسكە اسىرىلدى. ال 2024 -جىلى 170 جوبانى ىسكە اسىرۋعا 36,6 ميلليارد تەڭگە ءبولىندى. بۇل «اۋىل - ەل بەسىگى» باعدارلاماسىن جالپى قارجىلاندىرۋدىڭ 20 پايىزدان استامىن قۇرايدى»، - دەدى ۇكىمەت باسشىسى.
