شاكىرتىمدى تەننيس بيىگىنەن كورگىم كەلەدى - باپكەر

استانا. KAZINFORM - جۋىردا قازاقستاندىق تەننيسشى، 19 جاستاعى ساندۋعاش كەنجەبايەۆا جۇپتىق سىندا تۇركياداعى تۋرنيردە قاتارىنان ءۇش رەت چەمپيون اتانعان ەدى. وسىعان وراي Kazinform ءتىلشىسى ساندۋعاشتىڭ باپكەرى ارتۋر حايرۋتدينوۆپەن سۇحباتتاستى.

Сандуғаш Кенжебаева
Фото: Кейіпкердің жеке архивінен

- ارتۋر رۋستاموۆيچ، ساندۋعاشتى قاي كەزدەن بەرى جاتتىقتىرىپ كەلەسىز؟

- مەنىڭ ساندۋعاشتى باپتاپ كەلە جاتقانىما كوپ بولا قويعان جوق. Team Kazakhstan اكادەمياسىندا ءوزىم جاتتىقتىرۋشىلىق قىزمەتتى 2023-جىلدىڭ جازىنان باستادىم. ال ساندۋعاشپەن وتكەن جىلدىڭ ناۋرىزىنان بەرى بىرگەمىز. قازىر استانادامىز. ءبارى قالىپتى، جاتتىعۋ ويداعىداي وتۋدە.

- الدا قانداي جارىستار بار؟

- ەرەسەكتەر اراسىندا قازاقستان چەمپيوناتىنا قاتىسپاقشىمىز. سودان كەيىن تايلاند ەلىندە وتەتىن بىرنەشە حالىقارالىق تۋرنيردە باق سىنايمىز. بيىلعى ماقساتىمىز - الەمدىك رەيتينگىدە بارىنشا جوعارى كوتەرىلۋ، ITF WOMENS جارىستارىندا جەكەلەي سىندا العاشقى تيتۋلدى جەڭىپ الۋ.

الداعى بەس جىلدا مەنىڭ شاكىرتىم ساندۋعاش كەنجەبايەۆا WTA رەيتينگىسىندە توپ-100 گە ەنسە ەكەن دەيمىن. ول - وتە تالانتتى جانە ەڭبەكقور ويىنشى. ساندۋعاش تەننيس بيىگىنەن كورىنىپ جاتسا، بۇل مەن ءۇشىن ۇلكەن قۋانىش بولماق.

- ءسىز نەبارى 20 جاستاسىز. اقتوبەدە تەننيس الىپپەسىن ۇيرەنىپ، بىرنەشە جىل بۇرىن جاس وسپىرىمدەر اراسىندا ITF رەيتينگىسىندە 258-ورىنعا كوتەرىلدىڭىز. جالپى، سپورتتىق جولىڭىز نەدەن باستالىپ ەدى؟

- مەن 2008-جىلى 4,5 جاسىمدا اقتوبە قالاسىنداعى «نۇرسات» مەكتەپكە دەيىنگى ءبىلىم بەرۋ ورتالىعىندا «10 جاسقا دەيىنگى تەننيس» باعدارلاماسى بويىنشا گالينا كۋحتينانىڭ باسشىلىعىمەن تەننيسپەن تانىستىم. كەيىن مۇنى وبلىستىق بالالار-جاس وسپىرىمدەر سپورت مەكتەبىندە جالعاستىردىم. بوريس كۆاك پەن نەللي كۆاك العاشقى باپكەرلەرىم بولدى. 2013-جىلى سەرگەي كۆاكتىڭ توبىنا قوسىلدىم. سودان كەيىن كاسىبي تەننيسشى رەتىندەگى جولىم باستالىپ، العاشقى دودالارعا قاتىسىپ، رەيتينگىلىك ۇپاي جينادىم. ماعان تەننيس ويناۋ ءارقاشان ۇنايتىن.

كورتتاعى جاتتىعۋلاردان بولەك، تەوريالىق ساباقتار دا از بولمايتىن. وندا تاكتيكا قۇرىپ، كورتتا جانە ودان تىس جەردە ءوزىڭدى ۇستاۋ ەرەجەسىن ۇيرەندىك. سول كەزدە اقتوبەدە باسەكەلەستىك جوعارى بولدى. ءبارىمىز دە وزىق شىعۋ ءۇشىن تىرىساتىنبىز.

- ەندەشە، سپورتتىق جولىڭىزدى نەگە ەرتە اياقتادىڭىز؟

- مەن ءۇش رەت وتا جاساتتىم. سونىڭ ءارقايسىسىنان كەيىن جىل جارىم ۋاقىت بويى قالپىما كەلۋ كەرەك بولدى. Futures M15 ساناتىنداعى بىرنەشە جارىستا ۇزدىك شىقتىم، ەرەسەكتەر اراسىندا قازاقستان چەمپيوناتىندا جۇپتىق سىندا جەڭىمپاز اتاندىم.

ءبىراق تىزەمنىڭ اۋىراتىنى، اسىرەسە، جەكەلەي سىنداعى ماتچتاردا قوزعالۋعا قيىندىق كەلتىردى. بۇل ومىرىمدەگى كۇردەلى كەزەڭ ەدى، ارمانىمنان باس تارتۋعا تۋرا كەلدى. اتا-انام، باپكەرلەرىم، Team Kazakhstan اكادەمياسى جانە قازاقستان تەننيس فەدەراتسياسى باسشىلىعىمەن سويلەسكەننەن كەيىن 2023-جىلى سپورتتىق مانسابىمدى اياقتاپ، باپكەرلىك باعىتقا بەت بۇردىم.

- جاس جاتتىقتىرۋشى رەتىندە قانداي ماسەلەگە ماڭىز بەرۋ كەرەك دەپ ويلايسىز؟

- قازىرگى تاڭدا جاتتىعۋ بولسىن، جارىس بولسىن، مەن ءار كۇنىمنەن قاناعات الامىن. اسىرەسە، ءوزىڭ باپتايتىن شاكىرتىڭ العا وزسا، تابىسقا جەتسە، قۋانىشىڭ ەسەلەنە تۇسەدى. بىلىكتى باپكەر بولۋ ءۇشىن ۇنەمى ۇيرەنىپ، دامۋ وتە ماڭىزدى. بىلىكتىلىكتى ارتتىرۋ كۋرستارىنا بارىپ، بەلگىلى اكادەميالاردا ءبىلىمىمدى جەتىلدىرگىم كەلەدى. الەمدەگى مىقتى باپكەرلەردىڭ تاجىريبەسىن العىم كەلەدى. ەڭ باستىسى، ءبىر ورىندا تۇرىپ قالماي، العا جىلجي بەرۋ كەرەك دەپ ەسەپتەيمىن.

- اڭگىمەڭىزگە راحمەت. شاكىرتىڭىزبەن بىرگە تابىسقا جەتۋىڭىزگە تىلەكتەسپىز.

ەسكە سالا كەتەيىك، بۇدان بۇرىن ساندۋعاش كەنجەبايەۆانىڭ ءۇش رەت قاتارىنان تۇركياداعى تۋرنيردە ۇزدىك اتانعانىن جازعان بولاتىنبىز.

سوڭعى جاڭالىقتار