شاۆكات ميرزيەيەۆ قاسىم-جومارت توقايەۆپەن بەيرەسمي كەزدەسۋ وتكىزۋ ءۇشىن الماتىعا كەلە جاتىر
تاشكەنت. KAZINFORM - مەملەكەت باسشىسى قاسىم-جومارت توقايەۆتىڭ شاقىرۋىمەن وزبەكستان پرەزيدەنتى شاۆكات ميرزيەيەۆ جۇمىس ساپارىمەن الماتىعا اتتاندى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ساپار بارىسىندا قاسىم-جومارت توقايەۆ پەن شاۆكات ميرزيەيەۆ بەيرەسمي كەزدەسۋ وتكىزەدى. ونىڭ اياسىندا قازاق- وزبەك قارىم-قاتىناسىن تەرەڭدەتۋ مۇمكىندىكتەرى، حالىقارالىق جانە وڭىرلىك دەڭگەيدەگى وزەكتى ماسەلەلەر تالقىلانادى.
ەسكە سالايىق، كەيىنگى رەت مەملەكەت باسشىسى قاسىم-جومارت توقايەۆ پەن وزبەكستان پرەزيدەنتى شاۆكات ميرزيەيەۆ بىلتىر ساۋىردە حيۋا قالاسىندا بەيرەسمي كەزدەسۋ وتكىزگەن ەدى. ونىڭ بارىسىندا رەسمي استانا مەن تاشكەنت اراسىنداعى ستراتەگيالىق سەرىكتەستىك پەن وداقتاستىقتى ودان ءارى نىعايتۋ ماسەلەلەرى قارالدى.
قوسا كەتسەك، بيىل قاڭتار- اقپان ايلارىنىڭ قورىتىندىسى بويىنشا قازاقستان وزبەكستاننىڭ نەگىزگى ساۋدا سەرىكتەستەرىنىڭ ۇشتىگىندە قالدى. وسى ارالىقتا ەلىمىز كورشىلەس مەملەكەتكە 473 ميلليون دوللاردىڭ تاۋارىن ەكسپورتتاعان.
سونىمەن قاتار، قازاقستان مەن وزبەكستان ءوزارا تاۋار اينالىمىن 10 ميلليارد دوللارعا جەتكىزۋگە مۇددەلى. اتالعان كورسەتكىشكە قول جەتكىزۋ ءۇشىن قازاقستان مەن وزبەكستان اراسىندا قوسىمشا 4 ساۋدا ءدالىزى اشىلۋى مۇمكىن.
بۇعان قوسا، تاياۋدا شاۆكات ميرزيەيەۆ قازاقستانمەن بىرلەسىپ جاسىل ەنەرگيانى ەكسپورتتاۋ كەلىسىمىن ماقۇلدادى.
