شاحتاداعى اپات: قىتاي ءتوراعاسى قازاقستاندىقتارعا كوڭىل ايتتى

قاسىم-جومارت توقايەۆتىڭ اتىنا قاراعاندى وبلىسىنداعى كەن ورنىندا بولعان اپات سالدارىنان كوپتەگەن ادامنىڭ قازا تابۋىنا بايلانىستى شەت مەملەكەتتەردىڭ باسشىلارىنان، سونداي-اق حالىقارالىق ۇيىمداردىڭ جەتەكشىلەرىنەن كوڭىل ايتۋ جەدەلحاتتارى ءالى كەلىپ جاتىر.

kazinform بۇل تۋرالى اقورداعا سىلتەمە جاساپ حابارلايدى.

قىتاي حالىق رەسپۋبليكاسىنىڭ ءتوراعاسى شي جينپيڭ قايعىلى وقيعاعا بايلانىستى پرەزيدەنت قاسىم-جومارت توقايەۆقا جانە قازاقستان حالقىنا كوڭىل ايتتى.

«قازاقستاننىڭ قاراعاندى وبلىسىنداعى شاحتادا بولعان اپات سالدارىنان كوپتەگەن ادامنىڭ قازا تاپقانى تۋرالى سۋىت حاباردى تەرەڭ كۇيزەلىسپەن قابىلدادىم. قىتاي ۇكىمەتىنىڭ جانە حالقىنىڭ، سونداي-اق ءوزىمنىڭ اتىمنان قايتىس بولعان ازاماتتاردىڭ وتباسىلارى مەن جاقىن تۋىستارىنا قايعىرىپ كوڭىل ايتامىن»، - دەپ جازىلعان جەدەلحاتتا.

كوڭىل ايتۋ جەدەلحاتتارىن بولگاريا پرەزيدەنتى رۋمەن راديەۆ، ارمەنيا پرەزيدەنتى ۆااگن حاچاتۋريان، بوسنيا جانە گەرتسەگوۆينا پرەزيديۋمىنىڭ ءتوراعاسى جەلكا تسۆيانوۆيچ، ا و س ش ك باس حاتشىسى قايرات سارىباي جانە باسقالار جولدادى.

بۇعان دەيىن اپاتقا بايلانىستى رەسەي، بەلارۋس، وزبەكستان، قىرعىزستان، فرانسيا پرەزيدەنتتەرى مەن تۇركيا سىرتقى ىستەر مينيسترلىگى، ارمەنيا پرەمەر-ءمينيسترى كوڭىل ايتقان بولاتىن. پرەزيدەنت قاسىم-جومارت توقايەۆ قاراعاندى وبلىسىنداعى قايعىلى وقيعاعا وراي كوڭىل ايتقان بارلىق شەت مەملەكەتتەر باسشىلارى مەن قازاقستاندىقتارعا ريزاشىلىعىن ءبىلدىردى.

ەسكە سالايىق، 28- قازان كۇنى تۇنگى ساعات 02.33 تە قاراعاندى وبلىسىنداعى كوستەنكو اتىنداعى شاحتادا ءورت تۇتانىپ، ارتىنان جارىلىس بولدى. جەر استىندا جۇمىس ىستەپ جاتقان 252 كەنشىنىڭ 206 سى ءوز بەتىمەن جوعارى شىقتى.

سوڭعى مالىمەت بويىنشا 45 كەنشىنىڭ دەنەسى تابىلدى، بىرەۋى ىزدەستىرىلپ جاتىر.

اۋرۋحانالارعا 28 ادام جەتكىزىلدى.

«ارسەلورميتتال تەمىرتاۋ» ا ق- عا تيەسىلى 8 شاحتانىڭ جۇمىسى ۋاقىتشا توقتاتىلدى.

29- قازان ەلىمىزدە جالپىۇلتتىق ازا تۇتۋ كۇنى بولىپ جاريالاندى.

قاراعاندى وڭىرىنە بارعان مەملەكەت باسشىسى ۇكىمەتكە «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋ تۋرالى تاپسىرما بەردى. كەيىن ۇكىمەتتىڭ باسپا ءسوز قىزمەتى «ارسەلورميتتال تەمىرتاۋ» ا ق- نىڭ مەنشىك قۇقىعىن ق ر مەنشىگىنە قايتارۋ تۋرالى كەلىسىمشارتتىڭ اياقتالۋعا جاقىن ەكەنىن ءمالىم ەتتى.

ق ر ۇكىمەتى اپاتتان قازا تاپقانداردىڭ وتباسىلارىنا قانداي كومەك كورسەتىلەتىنىن جاريالادى.