شاڭحايدا كريشتيانۋ رونالدۋدىڭ الىپ ءمۇسىنى اشىلدى

استانا. KAZINFORM - 21-قاراشا كۇنى شاڭحاي قالاسىنداعى نانكين كوشەسىندە الەمدىك فۋتبولدىڭ جارقىن جۇلدىزى كريشتيانۋ رونالدۋدىڭ قۇرمەتىنە ارنالعان جەر بەتىندەگى ەڭ بيىك ەسكەرتكىش سالتاناتتى تۇردە اشىلدى. سونداي-اق اڭىز فۋتبولشىنىڭ قىتايداعى العاشقى مۋزەيىنىڭ اشىلۋ ءراسىمى ءوتتى. بۇل تۋرالى Shanghai Observer اقپاراتتىق باسىلىمى جازدى.

Шанхайда Криштиану Роналдудың алып мүсіні ашылды
Фото: Shanghai Observer

وسى جىلدىڭ 5-قاراشاسىندا رونالدۋ پورتۋگاليا ۇلتتىق قۇراماسىنداعى مانسابىن اياقتاعانىن جاريالاعان ەدى. ول قۇراما ساپىندا 234 ماتچ وتكىزىپ، 146 گول سوققان. سونداي-اق ەۋروپا چەمپيوناتىنىڭ ءبىر جانە ۇلتتار ليگاسىنىڭ ەكى دۇركىن جەڭىمپازى اتانعان.

ارادا ون شاقتى كۇننەن كەيىن، شاڭحايداعى نانكين كوشەسىندە فۋتبولشىنىڭ بيىكتىگى 7 مەترلىك ءمۇسىنى اشىلدى. مۇسىندە رونالدۋدىڭ جانكۇيەرلەرگە جاقسى تانىس گولدان كەيىنگى قيمىلى - SIU بەينەلەنگەن. جەتى مەترلىك بيىكتىك - فۋتبولشىنىڭ جەتىنشى ءنومىرلى جەيدەسىنىڭ يشاراسى. سونىمەن قاتار بۇل كورسەتكىش قىتايعا تانىمال Shanghai No.1 Department Store امبەباپ دۇكەننىڭ 77 جىلدىق مەرەيتويىمەن دە بايلانىستى.

مۇسىنمەن قاتار رونالدۋ مۋزەيى دە ماتەريكتىك قىتايدا كورەرمەندەرگە ايقارا ەسىك اشتى. بۇل الەمدىك سپورت جۇلدىزىنىڭ قىتايداعى ءىرى ساۋدا ورتالىعىندا اشىلعان العاشقى جەكە مۋزەيى.

مۋزەيدىڭ اشىلۋ راسىمىنە قاتىسقان فۋتبولشىنىڭ اعاسى ۋگۋ اۆەيرۋ ەكسپونات- جۇلدەلەردىڭ ايرىقشا مانىنە توقتالدى.

- مەن ءۇشىن دە، رونالدۋ ءۇشىن دە بۇل مۋزەي مەن شاڭحايدا قويىلعان جۇلدەلەر ءتارتىپتىڭ، ەڭبەكقورلىقتىڭ جانە تاباندىلىقتىڭ كورىنىسى. ءاربىر جۇلدەنىڭ تاريحىن كوپشىلىكپەن ءبولىسۋ - ءبىز ءۇشىن تەڭدەسى جوق قۋانىش. ولاردى قىتاي جانكۇيەرلەرى مەن جۇرتشىلىعىنا تانىستىرۋدى زور مارتەبە سانايمىز، - دەدى ول.

رونالدۋ مۋزەيىنىڭ اۋماعى 3 مىڭ شارشى مەترگە جۋىق، كەشەن 10 تاقىرىپتىق ءبولىم مەن 15 ارنايى كورمە كەڭىستىگىنە بولىنگەن. وندا فۋتبولشىنىڭ مادەيرا ارالىنداعى بالالىق شاعىنان «التىن دوپتى» بەس رەت يەلەنگەن مەرەيلى ساتىنە دەيىنگى سپورتتىق جولى كورسەتىلگەن.

كورمە كەڭىستىگىندە رونالدۋدىڭ تۋعان جەرى مادەيرا ارالىنىڭ ماكەتى، ليسسابوننىڭ «سپورتينگ» كلۋبىنداعى جاتتىعۋ بولمەسى مەن جەكە قوناق بولمەسىنىڭ، كيىم اۋىستىرۋ بولمەسىنىڭ جانە ساۋد ارابياسىنىڭ «ءال-ناسر» كلۋبىنىڭ الاڭعا شىعار كۇمبەزدى ەسىگىنىڭ 1:1 كوشىرمەسى كەلۋشىلەردى تاڭداي قاقتىرادى. ولار وسى ارقىلى فۋتبولشىنىڭ ءومىرى مەن سپورتتىق ورتاسىن جاقىننان تانىپ-بىلۋگە مۇمكىندىك الادى.

مۋزەيگە رونالدۋدىڭ تۋعان جەرىنەن 50 دەن استام جۇلدە، تاريحي جەيدە مەن فۋتبول اياقكيىمى جەتكىزىلگەن. ولاردىڭ باسىم بولىگى قىتايدا العاش رەت كوپشىلىك نازارىنا ۇسىنىلىپ وتىر.

ەكسپوناتتار قاتارىندا 2008 -جىلعى «التىن دوپ» جۇلدەسى، جاتتىقتىرۋشىسى زيدان مەن كوماندالاستارىنىڭ قولتاڭباسى قويىلعان جەيدە، پورتۋگاليا قۇراماسىنىڭ ەۋروپا چەمپيوناتى كۋبوگى جانە الاڭدا جىرتىلعان اياقكيىم بار. سونداي-اق رونالدۋ شاڭحايداعى مۋزەيگە ارناپ قولتاڭباسى قويىلعان جەيدەسىن سىيلىققا جىبەرگەن.

ەسكە سالايىق، بۇعان دەيىن فۋتبول تاريحىنداعى ەڭ ۇزدىك ويىنشىلاردىڭ ءبىرى رونالدۋدىڭ پورتۋگاليا ۇلتتىق قۇراماسىنداعى مانسابى اياقتالعانى تۋرالى جازعان ەدىك.