شاحمات وليمپياداسى: قازاقستان التىنشى جەڭىسىنە قول جەتكىزدى

بەسىنشى تۋردا وتانداستارىمىز گەرمانيا قۇراماسىنان باسىم ءتۇسىپ، تۋرنيردەگى قاتارىنان بەسىنشى جەڭىسىنە قول جەتكىزدى.

بەسىنشى تۋردا قازاقستان قۇراماسى گەرمانيامەن كەزدەسىپ، 2,5:1,5 ەسەبىمەن جەڭىسكە جەتتى. ءتورت تاقتاداعى تارتىستىڭ ۇشەۋى تەڭ اياقتالىپ، ماتچ تاعدىرىن مەرۋەرت كاماليدەنوۆانىڭ جەڭىسى شەشتى. ءبىرىنشى تاقتادا ءبيبىسارا اساۋبايەۆا دينارا ۆاگنەرمەن تەڭ ءتۇستى. الۋا نۇرمان مەن ەليزابەت پەتتس اراسىنداعى پارتيادا دا جەڭىمپاز انىقتالعان جوق. ءتورتىنشى تاقتادا ەلناز قالياحمەت پەن يانا شنايدەر ۇپاي ءبولىستى.

ال ءۇشىنشى تاقتادا مەرۋەرت كاماليدەنوۆا حاننا ماري كلەككە قارسى ويناپ، قازاقستانعا اسا ماڭىزدى ۇپاي سىيلادى. FIDE مالىمەتىنشە، كاماليدەنوۆا اق فيگۋرالارمەن ويناعان پارتيادا قارسىلاسىنىڭ 22-جۇرىستەگى قاتەلىگىن ءتيىمدى پايدالاندى. گەرمانيالىق شاحماتشىنىڭ 22...Bg5 جۇرىسىنەن كەيىن قازاقستاندىق سپورتشى 23.Rxa8 تاكتيكالىق سوققىسىن جاساپ، باسىمدىققا يە بولدى. كەيىن بۇل ارتىقشىلىقتى جەڭىسكە اينالدىردى. ناتيجەسىندە ءدال وسى پارتيا قازاقستان مەن گەرمانيا اراسىنداعى ماتچتىڭ قورىتىندى ەسەبىن انىقتادى.

بەس تۋر - بەس جەڭىس

قازاقستان ايەلدەر قۇراماسى بەس تۋردان كەيىن مۇمكىن بولعان 10 ماتچتىق ۇپايدىڭ بارلىعىن جينادى. وسىلايشا، ۇلتتىق قۇراما تۋرنيردى جەڭىلىسسىز جالعاستىرىپ كەلەدى. بەسىنشى تۋر قورىتىندىسى بويىنشا پولشا، قىتاي، قازاقستان جانە ازەربايجان قۇرامالارى بەس كەزدەسۋدىڭ بارىندە جەڭىسكە جەتىپ، 10 ماتچتىق ۇپايدان جينادى. كوماندالاردىڭ تۋرنير كەستەسىندەگى ناقتى ورنى قوسىمشا كورسەتكىشتەر ارقىلى انىقتالادى.

پولشا بەسىنشى تۋردا جارىستىڭ قازىرگى چەمپيونى ءۇندىستاندى 2,5:1,5 ەسەبىمەن جەڭىپ، ماڭىزدى ناتيجەگە قول جەتكىزدى. قىتاي بولگاريادان باسىم تۇسسە، ازەربايجان سەربيانى 3:1 ەسەبىمەن ۇتتى.

قازاقستان قۇراماسىندا كىمدەر بار؟

بيىلعى وليمپيادادا قازاقستان ايەلدەر قۇراماسىنىڭ نامىسىن ءبيبىسارا اساۋبايەۆا، الۋا نۇرمان، مەرۋەرت كاماليدەنوۆا، ەلناز قالياحمەت جانە زارينا نۇرعاليەۆا قورعاپ جاتىر. كوماندا كاپيتانى - پاۆەل كوتسۋر. قۇرامانىڭ ورتاشا رەيتينگى - 2438. قازاقستان ايەلدەر اراسىنداعى جارىستى باستاپقى رەيتينگتە ءۇشىنشى نومىرمەن باستادى.

ايتا كەتەيىك، 46-دۇنيەجۇزىلىك شاحمات وليمپياداسى سامارقاندتا ءوتىپ جاتىر. جارىس شۆەيتساريالىق جۇيە بويىنشا ۇيىمداستىرىلعان جانە 11 تۋردان تۇرادى. وليمپيادا 27-قىركۇيەككە دەيىن جالعاسادى. بەس تۋردان كەيىن قازاقستان ايەلدەر قۇراماسى جۇلدەلى ورىندار ءۇشىن كۇرەستەگى نەگىزگى توپتىڭ قاتارىندا كەلەدى. الدا تاعى التى تۋر بار.