شاعىن جانە ورتا بيزنەستىڭ ىشكى جالپى ونىمدەگى ۇلەسى 36 پايىزدان استى - پرەزيدەنت

پرەزيدەنت قاسىم-جومارت توقايەۆ «التىن ساپا» جانە «پارىز» سىيلىقتارىنىڭ يەگەرلەرىن ماراپاتتاۋ راسىمىندە ءسوز سويلەدى، دەپ حابارلايدى Kazіnform.

«بارشاڭىزدى «التىن ساپا»، «پارىز»، «قازاقستاننىڭ ۇزدىك تاۋارى» بايقاۋلارىنىڭ ءوز مارەسىنە جەتۋىمەن قۇتتىقتايمىن! ءبىز جىل سايىن وسى سالتاناتتى جيىندا ەل دامۋىنا ەلەۋلى ۇلەس قوسقان كاسىپكەرلەرگە قۇرمەت كورسەتەمىز. بۇل - تالاي جىلدان بەرى جاقسى داستۇرگە اينالعان ماڭىزدى ءىس-شارا. قازىر قازاقستاندا بيزنەس سالاسى قارقىندى دامىپ كەلەدى»، - دەدى مەملەكەت باسشىسى.

پرەزيدەنتتىڭ پايىمداۋىنشا، بۇعان مەملەكەت تاراپىنان بارلىق جاعداي جاسالىپ جاتىر.

«شاعىن جانە ورتا بيزنەستىڭ ىشكى جالپى ونىمدەگى ۇلەسى 36 پايىزدان استى. بۇل - شىن مانىندە، جوعارى كورسەتكىش. وسى سالادا جۇمىس ىستەيتىن ادامداردىڭ سانى 4,3 ميلليونعا جەتتى. ياعني ەڭبەككە جارامدى ازاماتتاردىڭ 45 پايىزى دەگەن ءسوز. يندۋستريالاندىرۋ جۇمىسى سوڭعى جىلدارى جوعارى قارقىنمەن جۇزەگە اسىرىلىپ كەلەدى. بىلتىر وڭدەۋ ونەركاسىبىنىڭ ەكسپورتى 26 ميلليارد دوللاردان استى. بۇل - رەكوردتىق كورسەتكىش. وتكەن جىلى وسى سالاعا 1,5 تريلليون تەڭگە ينۆەستيتسيا تارتىلدى. وڭدەۋ كاسىپورىندارىن دامىتۋعا بارىنشا جاعداي جاسالدى. سونىڭ ناتيجەسىندە رەسپۋبليكالىق بيۋدجەتكە تۇسەتىن سالىق 5 ەسە ارتتى. وسىلايشا، بيزنەس وكىلدەرى مەملەكەتتىڭ سەنىمدى سەرىكتەسىنە اينالدى»، - دەدى قاسىم-جومارت توقايەۆ.

كەلەسى جىلدان باستاپ ءىرى شيكىزات وندىرۋشىلەر ىشكى نارىقتىڭ سۇرانىسىن قامتاماسىز ەتۋگە مىندەتتى بولادى.
«ەلدى يندۋستريالاندىرۋ ءىسىن ودان ءارى جالعاستىرۋىمىز كەرەك. بۇل باعىتتا ناقتى شارالار قولعا الىنىپ جاتىر. ەكى جىل بۇرىن «ونەركاسىپ ساياساتى» تۋرالى ارناۋلى زاڭ قابىلداندى. وڭدەۋ كاسىپورىندارىن ارزان شيكىزاتپەن قامتاماسىز ەتۋ وتە ماڭىزدى. بۇگىندە ءىرى شيكىزات وندىرۋشىلەرمەن 25 كەلىسىم جاسالدى. بۇدان بولەك، شيكىزات باعاسىن ارزانداتۋ ءۇشىن قوسىمشا شارالار قولعا الىندى. كەلەسى جىلدان باستاپ ءىرى شيكىزات وندىرۋشىلەر ىشكى نارىقتىڭ سۇرانىسىن قامتاماسىز ەتۋگە مىندەتتى بولادى. ولار قازاقستانداعى وڭدەۋ مەكەمەلەرىنىڭ قاجەتتىلىگىن تولىق وتەسە عانا، شيكىزاتتى ەكسپورتتاي الادى»، - دەدى قاسىم- جومارت توقايەۆ.
مەملەكەت باسشىسىنىڭ ايتۋىنشا، بۇل شەشىم دايىن ءونىم وندىرۋگە جانە ونى سىرتقى نارىققا كوبىرەك شىعارۋعا ىقپال ەتەدى. سونداي- اق مىڭداعان جۇمىس ورنىن اشۋعا سەپتىگىن تيگىزەدى.