شاڭعى جارىسىنان قىتاي چەمپيوناتىندا ەكى قانداسىمىز 3 التىن مەدال جەڭىپ الدى
استانا. KAZINFORM - قىتايدىڭ التاي قالاسىنداعى سارىبۇلاق شاڭعى بازاسىندا وتكەن قىتايدىڭ ۇلتتىق چەمپيوناتىندا قانداستارىمىز ءۇش التىن مەدال جەڭىپ الدى. بۇل تۋرالى xinjiangnet.com.cn سايتى حابارلادى.
«قىتايدىڭ قارلى استاناسى» اتالاتىن التاي قالاسىندا 24-اقپاننان بەرى ءوتىپ جاتقان ەل بىرىنشىلىگىندە قىتايدىڭ تۇكپىر- تۇكپىرىنەن كەلگەن 18 كوماندا باق سىناپ جاتىر. جەتى كۇنگە جالعاساتىن اتالعان جارىستىڭ 3- كۇنگى قورتىنىدىسى بويىنشا ەكى قانداسىمىز 3 التىن مەدال قانجىعالاعان.
جارىستىڭ العاشقى كۇنىندە ەرلەر اراسىنداعى قۋدالاۋ (پەرسيۋت) جارىسىندا شىڭجاڭ شاڭعى كومانداسىنىڭ سپورتشىسى سامعار سەرىك ۇلى التىن مەدال ولجالادى. ال 25-اقپاندا ەرلەر اراسىنداعى قىسقا قاشىقتىققا جۇگىرۋدە (جەكە سپرينت) شىڭجاڭ شاڭعى كومانداسىنىڭ سپورتشىسى ەرنار ءابدىلحان ۇلى چەمپيون اتاندى. سونىمەن بىرگە جارىستىڭ ءۇشىنشى كۇنى ەرلەر اراسىنداعى 10 شاقىرىمدىق كلاسسيكالىق ستيلدەگى جارىستا سامعار سەرىك ۇلى تاعى دا التىن مەدال جەڭىپ العان.
ايتا كەتەيىك، بۇعان دەيىن قىتايدا قانداسىمىز جەڭىل اتلەتيكادان باس جۇلدەنى جەڭىپ العانى تۋرالى جازعان بولاتىنبىز.
باقىتجول كاكەش
