شاباندوزى – ۇلى بريتانيالىق، باپكەرى - امەريكالىق. قازاقتى قۋانتىپ، دۋبايدا ءبىرىنشى كەلگەن كابيرحاننىڭ يەسى سۇحبات بەردى

12- قاڭتاردا دۋبايداعى مەيدان يپپودرومىندا وتكەن بەدەلدى بايگەدە قازاقستاندىق كابيرحان ەسىمدى تۇلپار توپ جاردى.

2000 مەتر ۇزىندىقتاعى جارىسقا 13 سايگۇلىك قاتىسقان ەدى. كابيرحان بۇعان دەيىن دە 9 جارىسقا قاتىسىپ، سەگىزىندە ءبىرىنشى، تەك بىرەۋىندە ەكىنشى ورىن الىپ، تاڭعالارلىق ناتيجە كورسەتكەن. دۋبايداعى ەكىنشى بايگەدە دە قازاقستاندىق سايگۇلىك ءبىرىنشى كەلدى.

Massaget.kz ءتىلشىسى ەل اۋزىندا جۇرگەن كابيرحاننىڭ يەسى تىلەك مۇحانبەتقاليەۆپەن سۇحباتتاستى.

«يەسى - جەكە كاسىپكەر»

تىلەك مۇحانبەتقاليەۆتىڭ سوزىنشە، ءوزى - جەكە كاسىپكەر. ال اتبەگىلىككە وسىدان بىرنەشە جىل بۇرىن كەلىپتى.

«جەكە كومپانيام بار. ساتۋ-ساتىپ الۋمەن اينالىسامىن. ال اتبەگىلىكپەن اينالىسقانىما 5 جىلداي بولادى»، - دەيدى ول.

ونىڭ سوزىنشە، كابيرحاننان بولەك 4 جىلقىسى بار.

«ولار دا ۇشقىر بايگەگە قاتىسادى، رەسەيدە دايىندالىپ جاتىر. كابيرحان دۋبايدا. قالعان تورتەۋى رەسەيدە»، - دەيدى سايگۇلىكتىڭ يەسى.

«باعاسى قۇپيا، 2 جاسىندا ساتىپ الدىم»

كوپشىلىكتىڭ كوزى ءتۇسىپ، قىزىققان سايگۇلىكتى يەسى وسىدان 2 جىل بۇرىن ساتىپ العان ەكەن. الايدا قانشا تەڭگەگە ساتىپ العانىن ايتۋدى قۇپ كورمەدى. سونىمەن قاتار، ول كابيرحاندى ساتىپ الۋعا ۇسىنىس ءتۇسىپ، ءوزى تاڭداپ العانىن ايتتى.

«كابيرحاندى 2 جاسىندا ساتىپ الدىم. ءبىرىنشى يەسى الماتىدا تۇرادى. قۇپيا (قانشاعا ساتىپ العانى - ەسك.)»، - دەيدى ول.

تىلەك مۇحانبەتقاليەۆ كابيرحاننىڭ اعىلشىن تۇقىمدى جىلقى ەكەنىن راستادى.

«اعىلشىن تۇقىمى، ا ق ش- تا تۋعان، قازىر 4 جاستا. قازاقستاندا 2 جاسىندا 3 رەت جارىسقا قاتىستى. سوسىن 3 جاسىندا رەسەيگە جىبەردىم. رەسەيدە جارىس كوپ، رەيتينگى جوعارى. بىزدە الامان بايگە، قازاقتىڭ بايگەلەرى دامىعان، ول جاقتا ۇشقىر بايگە دامىعان. سوندىقتان رەسەيگە جىبەردىم. رەسەيدە باپتاعان سوڭ التى رەت شاپتى، بەس رەت ءبىرىنشى بولىپ كەلدى. ءبىر رەت ەكىنشى كەلدى. سودان كەيىن ءوزىم دۋبايعا جىبەرۋدى شەشتىم»، - دەيدى ول.

«ساتىلمايدى، ساتپايمىن!»

كابيرحان دۋبايدا ەكى مارتە كىل مىقتى تۇلپارلار باسەكەسىندە وق بويى وزىپ شىققان ەدى. وسىلايشا ونىڭ قانجىعاسى ايتارلىقتاي مايلاندى. اشىق دەرەككوز مالىمەتتەرىنە سۇيەنسەك، ءبىرىنشى جارىستا 15,5 ميلليون تەڭگەنىڭ ماراپاتىنا يە بولسا، ەكىنشىسىندە 1 ميلليون دوللاردىڭ سىياقىسىن ەنشىلەگەن.

ال سايگۇلىكتىڭ يەسى تۇلپاردى ساتپايتىنىن كەسىپ ايتتى.

«كابيرحان ساتىلمايدى. ساتپايمىن. جوسپارىمىزدا دۋبايداعى الەمدىك كۋبوكقا قاتىسۋ بار، 30- ناۋرىزدا بولادى. ال 4 جىلقىم رەسەيدە قاتىسادى»، - دەدى ول.

«شاباندوزى – ۇلى بريتانيالىق، باپكەرى - امەريكالىق»

دۋبايداعى ءبىرىنشى بايگەدە كابيرحاننىڭ شاباندوزى پەت دوببس ەكەنى ايتىلعان ەدى. بۇعان قاتىستى قوعامدا «كابيرحان دەگەن تۇلپارمەن كوپ ماقتانىپ ەدىك، شاباندوزى ورىس ەكەن عوي. كابيرحان ءوزى دە ارابيادان اكەلىنگەن ەمەس پە؟» دەگەن سىندى ءتۇرلى سىن پىكىر دە بار.

«شاباندوزى - اعىلشىن ۇلتىنىڭ وكىلى. قانداي شاباندوز شاباتىنىن باپكەر شەشەدى. سوعان ۇيرەنگەن شاباندوز بولۋى كەرەك. قازاقتىڭ شاباندوزدارىنان بىزدە تەك باۋىرجان مىرزابايەۆ بار. ول ەۋروپادا جانە جاپونيادا شاپقان. قالعاندارى وتىرا المايدى، وعان حالىقارالىق ليتسەنزيا كەرەك. حالىقارالىق تۋرنيرلەردە ليتسەنزياسىز شاباندوزدى جىبەرمەيدى. سەرتيفيكاتى بولۋى قاجەت»، - دەپ ءتۇسىندىردى كابيرحاننىڭ يەسى مۇنىڭ سەبەبىن.

قازىر تۇلپار دۋبايدا ەكەن.

«كابيرحاندى باپتايتىن - امەريكالىق باپكەر»، - دەيدى يەسى.

«كابيرحان قازاقتى قۋانتا بەرسىن!»

تىلەك مۇحانبەتقاليەۆ سايگۇلىكتى 1 ميلليون دوللارعا ساتۋ ۇسىنىلعانى قاۋەسەت ەكەنىن ايتادى.

«ول - وسەك، ساتىلمايدى. ۇسىنىستار بولعان دا بولار. نەگىزى ساتىلمايدى. ول - قازاق ەلىنىڭ اتى. قازاقستاننىڭ تۋىن كوتەرىپ، جەڭىسكە جەتە بەرەيىك»، - دەدى ول.

سونىمەن قاتار، كابيرحاننىڭ يەسى بايگەلەردە ناقتى قانشا سىياقى تىگىلەتىنىن دە اتاپ ايتۋدى ءجون كورمەدى.

ال جۇرت تامسانعان قازاقستاننىڭ سايگۇلىگى 30- ناۋرىزدا دۋبايدا وتەتىن ەڭ ۇلكەن بايگەگە قاتىسادى. اشىق دەرەككوزدە ءبىرىنشى ورىن العان تۇلپارعا 7 ميلليون 200 مىڭ ا ق ش دوللارى بەرىلەتىنى تۋرالى دەرەكتەر بار.

«ازىرشە 30- ناۋرىزعا دەيىن دۋبايدا بولادى. جارىستارعا ءوزىم بارىپ قاتىسىپ تۇرامىن. كابيرحان رەسەيدە دە، دۇنيەجۇزىندە دە سۇيىكتى سايگۇلىك بولىپ كەتتى. ءبارى قاراپ جاتىر. قازاقستاننىڭ اتىن شىعارىپ جاتىر. كابيرحان ءبىزدى قۋانتا بەرسىن!» - دەپ تۇيىندەدى يەسى اڭگىمەسىن.

ەسكە سالايىق، بۇعان دەيىن تىلەك مۇحانبەتقالييەۆ سايگۇلىكتىڭ اۋكتسيونداعى باعاسى 12,5 مىڭ دوللار بولعانىن، ال اتىن كابيرحان دەپ الدىڭعى يەسى قويعانىن ايتقان ەدى.