ش ى ۇ سامميتى ءوتىپ جاتقاندا تەرروريستىك قاۋىپتىڭ «سارى» دەڭگەيى ەنگىزىلەدى – ۇ ق ك

КНБ РК  ҚР ҰҚК
فوتو: مۋحتور حولدوربەكوۆ/ Kazinform

استانا. KAZINFORM - ۇلتتىق قاۋىپسىزدىك كوميتەتى 2-5-شىلدە ارالىعىندا استانادا وتەتىن شاڭحاي ىنتىماقتاستىق ۇيىمىنىڭ سامميتىنە وراي تۇرعىندارعا ۇندەۋ جاسادى.

«قۇرمەتتى استانانىڭ، الماتى، قاراعاندى جانە كوكشەتاۋ قالالارىنىڭ تۇرعىندارى مەن قوناقتارى! قازاقستاندا-شىلدەنىڭ 2-5 ارالىعىندا ءبىرقاتار ماڭىزدى حالىقارالىق ءىس-شارالار، ونىڭ ىشىندە شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەسى مەن قىتاي حالىق رەسپۋبليكاسى ءتوراعاسىنىڭ مەملەكەتتىك رەسمي ساپارى وتەدى. وسىعان وراي الەمگە بەلگىلى تاجىريبەگە سايكەس ۋاكىلەتتى مەملەكەتتىك ورگاندار كەلەتىن شەتەلدىك دەلەگاتسيالاردىڭ، ولاردىڭ ىشىندە مەملەكەت باسشىلارى مەن حالىقارالىق ۇيىمدار باسشىلارىنىڭ قاۋىپسىزدىگىن جوعارى دەڭگەيدە قامتاماسىز ەتۋگە تولىققاندى شارالار قابىلدايدى. تەرروريزمگە قارسى ءىس-قيمىل تۋرالى زاڭنىڭ 12, 13 جانە 15-باپتارىنا سايكەس كۇزەتىلەتىن تۇلعالاردىڭ قاۋىپسىزدىگىن قامتاماسىز ەتۋ بويىنشا كۇزەت ءىس-شارالارىن وتكىزۋ كەزىندە تەرروريزمگە قارسى كۇرەس رەسپۋبليكالىق جەدەل شتابتىڭ باسشىسى رەتىندە قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ شەشىمىمەن استانا، الماتى، قاراعاندى جانە كوكشەتاۋ قالالارىنىڭ جەكەلەگەن ۋچاسكەلەرىندە تەرروريزمگە قارسى وپەراتسيانىڭ قۇقىقتىق رەجيمىندە قۇقىقتىق ءتارتىپ پەن قوعامدىق قاۋىپسىزدىكتى قولداۋ ءىس-شارالارى وتەدى» دەپ ەسكەرتەدى كوميتەتتەن.

قۇقىقتىق رەجيم 2-شىلدە 00:01- دەن باستاپ 4-شىلدە 23:59-عا دەيىن شاڭحاي ىنتىماقتاستىق ۇيىمىنىڭ سامميتى وتكىزىلەتىن وبەكتىلەر اۋماعىنا جانە كۇزەتىلەتىن تۇلعالاردىڭ ءجۇرۋ باعىتتارىندا ەنگىزىلەدى.

كۇزەتىلەتىن تۇلعالاردىڭ اقمولا، قاراعاندى وبلىسى مەن الماتى قالاسى اۋماعىنا كەلگەن جاعدايدا ولار كەلگەن كەزەڭگە جانە اتالعان وڭىرلەرگە بولاتىن ورىندارىنا تەرروريزمگە قارسى وپەراتسيانىڭ قۇقىقتىق رەجيمى جاريالانادى.

تەرروريزمگە قارسى وپەراتسيا وتكىزۋ ايماقتارىندا كۇزەتىلەتىن تۇلعالار بولعان كەزەڭدەرىندە ول ايماقتاردا ادامداردىڭ جانە اۆتوكولىكتەردىڭ قوزعالىسىنا شەكتەۋ قويىلادى.

كۇزەتىلەتىن تۇلعالار جۇرەتىن ارنايى تراسسا ۋچاسكەلەرىندە قالالىق جولاۋشىلار كولىگىنىڭ قوزعالىسى توقتاتىلادى.

ءتيىستى باعدارلارداعى وزگەرىستەر جايىندا استانا قالاسىنىڭ اكىمدىگى حابارلايدى.

«بۇدان باسقا، قازاقستان پرەزيدەنتىنىڭ 2013 -جىلعى 9-تامىزداعى № 611-جارلىعىمەن بەكىتىلگەن «تەرروريزم اكتىسى قاتەرىنىڭ تۋىنداۋى تۋرالى اقپارات مونيتورينگىنىڭ جانە حالىقتى حاباردار ەتۋدىڭ مەملەكەتتىك جۇيەسىنىڭ ۇيىمداستىرىلۋى مەن جۇمىس ىستەۋ قاعيدالارىنا» سايكەس تەرروريزمگە قارسى وپەراتسيانىڭ قۇقىقتىق رەجيمى ەنگىزىلۋىن ەسكەرە وتىرىپ، استانا، الماتى، قاراعاندى جانە كوكشەتاۋ قالالارىنىڭ شاڭحاي ىنتىماقتاستىق ۇيىمىنىڭ سامميتىن وتكىزۋ وبەكتىلەرىندە 2-شىلدە 00:01-دەن باستاپ 4-شىلدە 23:59-عا دەيىن تەرروريستىك قاۋىپتىڭ ءبىرقالىپتى («سارى») دەڭگەيى بەلگىلەنەدى. ءبىرقالىپتى دەڭگەي ۋاكىلەتتى مەملەكەتتىك ورگانداردىڭ ۇيىمداستىرۋشىلىق، اكىمشىلىك جانە جەدەل ءىس-شارالار كەشەنىن وتكىزۋدى كوزدەيدى» دەپ ەسكەرتەدى ۇقك.

اتاپ ايتقاندا:

- جەكەلەگەن اۋماقتاردا كولىك قۇرالدارى مەن جاياۋ جۇرگىنشىلەردىڭ قوزعالىسىنا شەكتەۋ ەنگىزەدى؛

- كينولوگيا قىزمەتىنىڭ ماماندارىن تارتا وتىرىپ، كوشەلەردە، الاڭداردا، ستاديونداردا، سكۆەرلەردە، ساياباقتاردا، ماگيسترالدى تەمىرجول جەلىلەرىندە، تەمىرجول ۆوكزالدارىندا، اۆتوۆوكزالداردا، اۋەجايلاردا، مەتروپوليتەن وبەكتىلەرىندە، بۇقارالىق جانە جاپپاي ءىس-شارالار وتەتىن ورىنداردا پاترۋلدى كۇشەيتەدى؛

- جارىلعىش قۇرىلعىلاردى انىقتاۋ جانە جويۋ بويىنشا تەرروريستىك تۇرعىدان وسال وبەكتىلەرگە جانە ادامدار كوپ جينالاتىن ورىندارعا، بۇقارالىق جانە جاپپاي ءىس-شارالارعا قاتىسۋشىلاردىڭ قوزعالۋلارىنىڭ نەگىزگى باعدارلارىنا تەكسەرۋ جۇرگىزەدى؛

- اۋەجايلاردا، مەتروپوليتەن وبەكتىلەرىندە، تەمىرجول ۆوكزالدارىندا جانە اۆتوۆوكزالداردا جەتە تەكسەرۋ ءىس-شارالارىن وتكىزۋ بارىسىندا ارنايى تەحنيكا قۇرالدارىن پايدالانۋ ارقىلى رەجيمدىك شارالاردى كۇشەيتەدى.

«ارنايى مەملەكەتتىك جانە قۇقىق قورعاۋ ورگاندارىنىڭ جۇمىسىنا تۇسىنىكپەن قارالاۋلارىڭىزدى جانە ولاردىڭ قىزمەتكەرلەرىنىڭ زاڭدى تالاپتارىن ساقتاۋدى سۇرايمىز» دەيدى ۆەدومستۆودان.

اۆتور

جانات قاپالبايەۆا

سوڭعى جاڭالىقتار