ش ى ۇ قورعانىس مينيسترلەرىنىڭ كەڭەسى: ءبىزدىڭ ۇيىم- اسكەري- ساياسي بلوك ەمەس

 استانا. KAZINFORM - استانادا شانحاي ىنتىماقتاستىق ۇيىمىنا مۇشە ەلدەردىڭ قورعانىس مينيسترلەرىنىڭ كەڭەسى ءوتتى.

كەڭەستە حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى تالقىلانىپ، قورعانىس ۆەدومستۆولارى اراسىنداعى ىنتىماقتاستىقتى دامىتۋ قادامدارى ايقىندالدى.

سونداي- اق، ش ى ۇ- نىڭ اسكەري- ساياسي بلوك ەمەستىگى، سالاداعى ءوزارا ءىس- قيمىل باسقا ەلدەرگە قارسى باعىتتالماعانى ايتىلدى.

كەڭەس قىزمەتى اسكەري سالاداعى سەنىم شارالارىن نىعايتۋعا، وڭىرلىك قاۋىپسىزدىكتىڭ سىن- تەگەۋرىندەرى مەن قاتەرلەرىنە قارسى ءىس- قيمىل جونىندەگى كۇش- جىگەردى ۇيلەستىرۋگە باعىتتالعان. وسىعان بايلانىستى «بەيبىت ميسسيا» تەرروريزمگە قارسى بىرلەسكەن اسكەري وقۋ- جاتتىعۋلارىن وتكىزۋدى جالعاستىرۋ قاجەتتىگى ءسوز بولدى.

قورعانىس ۆەدومستۆولارىنىڭ باسشىلارى ۇيىمعا مۇشە مەملەكەتتەر قارۋلى كۇشتەرىنىڭ قىزمەتىن ناسيحاتتاۋ ءۇشىن اسكەري- تاريحي مۇراجايلار اراسىنداعى ءوزارا ءىس- قيمىلدى دامىتۋعا كەلىستى.

قازاقستاننىڭ قورعانىس ءمينيسترى رۋسلان جاقسىلىقوۆ ۇيىمنىڭ تاريحىنا توقتالىپ، كەلەشىگىمەن بايلانىستى ۇسىنىستار ايتتى.

اتاپ ايتساق، سەنىم شارالارى تۋرالى كەلىسىمدى ازىرلەۋدى جانە قابىلداۋ ۇسىنىلدى.

كەڭەس قورىتىندىسى بويىنشا حاتتاما مەن ىنتىماقتاستىقتى رەتتەيتىن ءبىرقاتار قۇجاتقا قول قويىلىپ، بىرلەسكەن كومميۋنيكە قابىلداندى.

سونداي- اق، قازاقستاننىڭ قورعانىس ءمينيسترى مەن شاڭحاي ىنتىماقتاستىق ۇيىمىنىڭ باس حاتشىسى بىرلەسكەن مالىمدەمە جاسادى.