ش ى ۇ-نىڭ استانا دەكلاراتسياسىندا بەيبىت الەمدى دامىتۋ فورمۋلاسى ۇسىنىلادى - ساراپشى پىكىرى

Бауыржан Серікбаев
فوتو: كازينفورم

استانا. KAZINFORM - ش ى ۇ-نىڭ استانا دەكلاراتسياسىندا بەيبىت الەمدى دامىتۋ فورمۋلاسى ۇسىنىلادى. مۇنداي پىكىردى ەلورادادا ءوتىپ جاتقان ش ى ۇ سامميتى اياسىندا ساراپشى باۋىرجان سەرىكبايەۆ ءبىلدىردى.

«سامميتتىڭ ماڭىزى وتە جوعارى. ونى قاتىسۋشى مەملەكەتتەردىڭ ساياسي سالماعىنان جانە ب ۇ ۇ باس حاتشىسىنىڭ ارنايى قاتىسۋىنان-اق تۇسىنۋگە بولادى. ءىس-شاراعا 15 ەلدىڭ باسشىلارى، الەمنەن 10 مىڭعا جۋىق دەلەگات، سونداي-اق حالىقارالىق ۇيىمداردىڭ جەتەكشىلەرى كەلدى. سامميتتىڭ تاعى ءبىر ەرەكشەلەگى - قازاقستاننىڭ 1 جىل بويى اتقارعان ءتوراعالىعىنىڭ قورىتىندىسى. 1 جىلدىڭ ىشىندە ەلىمىزدىڭ توراعالىعىمەن 100 گە جۋىق ءىس-شارا ۇيىمداستىرىلدى. ءبىر-ەكى مىسالعا توقتالسام، تۇركىستان قالاسىندا ش ى ۇ-عا مۇشە مەملەكەتتەردىڭ مادەني ورتالىقتارىن، تاريحي قالالارىن زەردەلەۋ اياسىن كەڭەيتۋگە باعىتتالعان عىلىمي- زەرتتەۋ كونفەرەنتسياسى ءوتتى. ەكولوگيا ماسەلەسى دە، ازىق-تۇلىك قاۋىپسىزدىگى دە كوتەرىلدى. الەمدە جىل سايىن قۋاڭشىلىق ارتىپ كەلەدى. اۋىز سۋدىڭ جەتىسپەۋشىلىگى دە بايقالادى. سۋ تاسقىنى دا الەمنىڭ تۇكپىر-تۇكپىرىندە ورىن الىپ جاتىر. وسى ورايدا ازىق-تۇلىك ماسەلەسىن شەشۋ ءۇشىن قازاقستان ناقتى باسىمالارىن كوتەرىپ وتىر»، - دەدى ساراپشى اگەنتتىك تىلشىسىنە بەرگەن سۇحباتىندا.

سونىمەن قاتار ول بۇگىن ەلوردادا ءوتىپ جاتقان سامميتتە استانا دەكلاراتسيا قابىلداناتىندىعىن ايتتى.

«قۇجاتتا ش ى ۇ اتىنان بەيبىت الەمدى دامىتۋعا بايلانىستى بەلگىلى ءبىر فورمۋلا ۇسىنىلادى. ياعني، بۇگىندە، گەوساياسي تەكەتىرەستەر ءارتۇرلى الاڭدا بولىپ جاتقان كەزدە ش ى ۇ الەمدى بەيبىت دامىتۋ ماقساتىندا ءوزىنىڭ رەسمي كوزقاراسىن بىلدىرەدى دەگەن ءسوز»، - دەدى ول.

سونىمەن قاتار ساراپشى بەلارۋس ەلى 2022 -جىلى ش ى ۇ-عا مۇشە بولۋعا ءوتىنىش بىلدىرگەنىن ەسكە سالدى.

«3 جىلدان كەيىن بۇگىن مىنە بەلارۋس تولىققاندى مۇشە بولىپ وتىر. دەمەك، ۇيىمنىڭ گەوگرافيالىق ايماعى دا كەڭەيە ءتۇستى. مەنىڭشە، كەشكە دەيىن ءالى دە ماڭىزدى مالىمدەمەلەرگە، قۇجاتتارعا قول راسىمىنە كۋا بولامىز»، - دەدى باۋىرجان سەرىكبايەۆ.

ايتا كەتەيىك، ەلورداداعى تاۋەلسىزدىك سارايىندا قازاقستان توراعالىعىمەن شاڭحاي ىنتىماقتاستىق ۇيىمىنىڭ سامميتى باستالدى.

قازاقستان پرەزيدەنتى قاسىم-جومارت توقايەۆ ش ى ۇ سامميتىنە كەلگەن مارتەبەلى مەيمانداردى قارسى الىپ، قول الىستى. ەل باسشىلارىن قارسى الۋ ءراسىمى اياقتالدى.

بەلارۋس ش ى ۇ-نىڭ تولىققاندى مۇشەسى بولدى. شاڭحاي ىنتىماقتاستىق ۇيىمىنىڭ سامميتىندە مۇشە مەملەكەتتەردىڭ باسشىلارى بەلارۋس رەسپۋبليكاسىن ۇيىم مۇشەلەگىنە قابىلداۋعا قاتىستى ءبىرقاتار قۇجاتقا قول قويدى.

شاڭحاي ىنتىماقتاستىق ۇيىمى حالىقارالىق قاتىناس جۇيەسىنىڭ ماڭىزدى تەتىگىنە اينالدى. بۇل تۋرالى سامميتتە مەملەكەت باسشىسى قاسىم-جومارت توقايەۆ ايتتى.

اۆتور

مارلان جيەمباي

سوڭعى جاڭالىقتار