ش ق و-داعى سۋ تاسقىنى قاۋپى جوعارى ەكى تاۋلى اۋدانداعى قازىرگى جاعداي قانداي

وسكەمەن. KAZINFORM - شىعىس قازاقستان وبلىسىندا سۋ تاسقىنىن بولدىرماس ءۇشىن جۇمىس جوسپارى دايىندالىپ، قاجەتتى قۇرالدار ازىرلەنگەن.

نوسەرلى جاۋىن- شاشىنعا بايلانىستى كاتونقاراعاي جانە التاي اۋداندارىنداعى شاعىن وزەندەر تاسۋى مۇمكىن. قاۋىپتى ۋچاسكەلەر انىقتالىپ، تاۋلىك بويى باقىلاۋ جۇرگىزىلۋدە. وبلىس اكىمى ەرمەك كوشەربايەۆ سۋ تاسقىنى قاۋپى جوعارى وسى ەكى تاۋلى اۋداندا بولىپ، قازىرگى جاعدايمەن تانىستى.

«توتەنشە جاعداي كەزىندەگى ارەكەتتەر تىزبەگى ازىرلەنىپ، بارلىق كۇشتەر مەن رەسۋرستار ۇيلەستىرىلدى. توتەنشە جاعدايلار دەپارتامەنتى، پوليتسيا، ورمانشىلىق، جەرگىلىكتى اتقارۋشى ورگانداردىڭ وكىلدەرى بىرلەسە جۇمىس ىستەيدى. اركىم ءوز ۋچاسكەسىن انىقتاپ، ۇنەمى باقىلاۋدا ۇستاۋ قاجەت. ينەرتتى ماتەريالدار قورى، تەحنيكا تولىقتاي دايىن»، - دەدى اكىم.

ءۇي جانۋارلارىنا ارنالعان ەۆاكۋاتسيالىق پۋنكتتەر مەن الاڭدار دايىندالدى. قۇتقارۋشىلار مۇزدىڭ بارىسىن باقىلاپ، كەپتەلىستى تەز جويۋعا ءازىر.

«7-ساۋىردە التاي اۋدانى بوگاتىريەۆو اۋىلىندا ەكى جەكە تۇرعىن ءۇيدىڭ اۋلاسىنا سۋ كىرگەن ەدى. زارداپ شەككەندەر جوق. ت ج د قىزمەتكەرلەرى بۇقتىرما وزەنىندە جارىلىس جۇمىستارىن جۇرگىزدى. اعىندى سۋدىڭ كەدەرگىسىز ءوتۋى ءۇشىن شاعىن سۋ ايدىندارىنىڭ ارنالارىن تەرەڭدەتۋ جۇرگىزىلۋدە. بۇل وزەن ۇلكەن الاڭداتۋشىلىق تۋعىزادى. ويتكەنى گيدرولوگتاردىڭ ايتۋىنشا، مۇنداي وزەندەر بىرنەشە ساعات ىشىندە ءقاۋىپتى بەلگىگە دەيىن تولىپ كەتۋى مۇمكىن»، - دەپ حابارلادى وبلىس اكىمىنىڭ باسپا ءسوز قىزمەتى.