ش ق و-دا قار استىندا قالعان اۋىل تۇرعىندارى ءبىر-بىرىنە قالاي كومەكتەسىپ جاتىر

қар
فوتو: ۆيدەودان الىنعان كادر

وسكەمەن. KAZINFORM - شىعىس قازاقستان وبلىسى كۇرشىم اۋدانىندا 7-قاڭتاردان بەرى قالىڭ قار جاۋىپ، بوران سوعىپ تۇر. سونىڭ سالدارىنان اۋىلداردىڭ حالقى قار قۇرساۋىندا قالعان. ءبىراق سوعان مويىماي، ءبىر جاعادان باس، ءبىر جەڭنەن قول شىعارعان جۇرت تابيعاتتىڭ توسىن مىنەزىنە توتەپ بەرۋدە.

قار استىندا قالعان اۋىلدار پرەزيدەنت جارلىعىمەن جاڭادان قۇرىلىپ جاتقان مارقاكول اۋدانىندا قاراستى. الايدا اۋدان ءالى زاڭ بويىنشا رەسىمدەلىپ، ناقتى شەكاراسى بەلگىلەنبەدى.

وسى جىلدىڭ 8 قاڭتارىندا مارقاكول اۋدانىنىڭ ءماسليحاتى قۇرىلىپ، ءماسليحاتتىڭ ءبىرىنشى سەسسياسى ءوتىپ، ءتوراعاسى سايلاندى.

ال اۋدان اكىمىن 25-قاڭتارعا دەيىن تاعايىنداۋ جوسپارلانعان. تەك سودان كەيىن اۋدان اكىمى اپپاراتىنىڭ مەملەكەتتىك مەكەمەسىن قۇرۋ تۋرالى قاۋلى، اپپاراتتى باسقارۋ سحەماسى قابىلدانباق.

سوندىقتان ازىرشە كۇرشىم اۋدانى دەپ جازىپ وتىرمىز.

قاھارىنا مىنگەن قىس ءبىر اپتادان استام ۋاقىت بويى اۋىلدارعا قاردى ءۇيىپ-توكتى. وسىلايشا، حالىق ۇيلەرىنەن شىعا الماي، قالامەن، اۋدان ورتالىعىمەن بايلانىس ۇزىلگەن.

جاعدايى قيىنداعان ناۋقاسقا دا جەدەل جاردەم جەتە الماي قالدى. جولدا قالعاندار، قىستاقتا قامالعاندار دا بار.

ەل ورىستەگى مالىن قوراعا ايداي الماي، ابدەن اۋرە-سارساڭعا تۇسكەن. بۇل تۋرالى بىزگە مارقاكولدىك قايىرحان بايگۇندينوۆ ايتىپ بەردى.

«وسىنداي قيىن-قىستاۋ ساتتە جۇرتىمىز جۇمىلا ارەكەت ەتۋدە. ءبىر-بىرىنە قولدان كەلگەنشە كومەكتەسىپ جاتىر. جولدا قالعان جاندارعا اسكەريلەر دە كومەك كورسەتتى. جاعداي قيىنداعاندا اقشا جيناستىرىپ، ۆولونتەرلەردى ىزدەستىرە باستادىق. قار كۇرەيتىن تەحنيكالار تارتىلۋدا. شۇكىر، زارداپ شەككەن ەشكىم جوق. قالىڭ قاردان ورىستەگى جىلقى تەبىندەي الماي قالدى. مالدى قوراعا جەتكىزۋ دە مۇڭعا اينالعان. سودان ويلانا كەلە جىلقىلاردىڭ باسىن قوسىپ، بوران اۋىلىنا دەيىن ايداپ اكەلىپ، سوندا باعىپ، امان ساقتاپ قالىپ جاتىرمىز. مال شىعىنى دا جوق»، - دەيدى ول.

مارقاكول اۋىلىندا دۇكەن ۇستاپ وتىرعان جەكە كاسىپكەر نازگۇل امانجولوۆا حالىققا ازىق-تۇلىك ۇلەستىرىپ، ەرىكتىلەردى جيناستىرىپ، باعىتتاپ ءجۇر. ال قۇماربەك باتۋ ەسىمدى كاسىپكەر 100 مىڭ تەڭگەنىڭ ازىق-تۇلىگىن اۋىلداستارىنا تاراتقان.

باسقا دا كاسىپ يەلەرى تاسادا قالماي زاتتاي، قارجىلاي كومەكتەسۋدە. 50 دەن استام ادامنان قۇرالعان ەرىكتىلەر توبى قارتتار تۇراتىن ۇيلەردىڭ ەسىك الدىن كۇرەپ، توبەلەرىن قاردان تازارتىپ، اعاش-كومىرلەرىن دايىنداۋدا.

«شاناعاتتى اۋىلىندا ەلەكتر جەلىسى ءۇزىلىپ، تۇرعىندار جارىقسىز وتىر. ەلەكترشىلەر اۋىلعا جەتە الماۋدا. كەشە ۇرانحايكا اۋىلىنا ش ق و توتەنشە جاعدايلار دەپارتامەنتىنىڭ 2 قار تازالاعىش تەحنيكاسى جۇمىلدىرىلدى. ءتوسقايىڭ اۋىلىندا اۋىرىپ جاتقان كىسىگە بۇگىن تىكۇشاق ۇشىپ كەلدى. اۋدانداعى جاعداي وبلىس اكىمدىگىنىڭ باقىلاۋىنا الىنىپتى. بۇنى ەستىپ قۋاندىق. بۇرىن 1966 -جىلى بىزدە تۋرا وسىنداي جاعداي بولعان. ول كەزدە مەن بالامىن. وندا دا تىكۇشاقتار تارتىلعان ەدى»، - دەيدى قايىرحان بايگۇندينوۆ.

ايتا كەتەيىك، قازىرگى ۋاقىتتا كۇرشىم اۋدانىندا جەرگىلىكتى اۋقىمداعى تابيعي سيپاتتاعى توتەنشە جاعداي جاريالانعان.

 

سوڭعى جاڭالىقتار