ش ق و اۋماعىنىڭ تەڭ جارتىسى ءالى دە قار استىندا جاتىر
وسكەمەن. KAZINFORM - شىعىس قازاقستان وبلىسى اۋماعىنىڭ تەڭ جارتىسىندا ءالى دە قار جاتىر.
قازىرگى ۋاقىتتا وبلىستا سۋ تاسقىنىنىڭ ءبىرىنشى تولقىنى اياقتالۋدا. الايدا تاۋلى جەرلەردە قار ءالى قالىڭ. بۇگىندە جالپى ءوڭىر اۋماعىنىڭ %50 دان استامىندا قار جاتىر.
اۋا تەمپەراتۋراسىنىڭ جوعارىلاۋى مەن جاۋىن-شاشىننىڭ مول بولۋ مۇمكىندىگىن ەسكەرە وتىرىپ، ءساۋىر ايىنىڭ ورتاسىنا قاراي سۋ تاسقىنىنىڭ ەكىنشى تولقىنى كۇتىلۋدە. بۇقتىرما، ءۇلبى، ۇبە، تۇرعىسىن، كۇرشىم، قالجىر جانە حامير وزەندەرىندە سۋ دەڭگەيى كوتەرىلۋى ىقتيمال.
«سۋ تاسقىنى جاعدايىن باقىلاۋ ءۇشىن تۇراقتى تۇردە اەروۆيزۋالدىق تەكسەرۋلەر جۇرگىزىلۋدە. 132 گيدروتەحنيكالىق قۇرىلىس شتاتتىق رەجيمدە جۇمىس ىستەۋدە. بوگەتتەردە سۋدىڭ دەڭگەيى الدىن الا تومەندەتىلگەن. قىزىل سۋدىڭ جانە وزەندەردە مۇز كەپتەلىسىنىڭ وتۋىنە مونيتورينگ كۇشەيتىلدى. سۋ تاسقىنى ۋچاسكەلەرىن بارلاۋ جالعاسۋدا»، - دەپ حابارلادى ش ق و اكىمىنىڭ باسپا ءسوز قىزمەتىنەن.
وبلىستا جەدەل شتاب تاۋلىك بويى جۇمىس ىستەۋدە. كۇشتەر مەن قۇرالدار ءازىر تۇر.
