ش ق و-داعى التىن كەن ورنىنا قاتىستى اسا ءىرى كولەمدەگى الاياقتىق دەرەگى بويىنشا قىلمىستىق ءىس تەرگەلىپ جاتىر

قىلمىستىق-پروتسەستىك شارالارعا كاسىپورىننىڭ شەتەلدىك سەرىكتەستەرىنىڭ رەسمي ءوتىنىشى نەگىز بولدى. تەرگەۋ جۇمىستارى بايىتۋ فابريكاسىن سالۋ جونىندەگى ينۆەستيتسيالىق مىندەتتەمەلەردىڭ ورىندالماۋىنا بايلانىستى باستالعان.

- «Z Metals Holding Limited» كومپانياسى قۇرىلتايشىلارىنىڭ ءوتىنىشى نەگىزىندە 2026-جىلعى 15-ماۋسىمدا ق ر باس پروكۋراتۋراسى قىلمىستىق كودەكستىڭ 190-بابى 4-بولىگىنىڭ 2-تارماعى (اسا ءىرى مولشەردە جاسالعان الاياقتىق) بويىنشا قىلمىستىق ءىس قوزعادى. ءىس شىعىس قازاقستان وبلىسىنىڭ پوليتسيا دەپارتامەنتىنە جولداندى. قازىرگى ۋاقىتتا سوتقا دەيىنگى تەرگەپ-تەكسەرۋ جالعاسىپ جاتىر. ونىڭ بارىسى باس پروكۋراتۋرانىڭ باقىلاۋىندا. تەرگەۋ مۇددەسىنە بايلانىستى وزگە اقپاراتتى جاريالاۋعا تىيىم سالىنعان،- دەپ حابارلادى ش ق و پروكۋراتۋراسىنان.

وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى كەن ورنىنىڭ قازىرگى جاعدايىنا قاتىستى مالىمەت بەردى.

2013-جىلدىڭ جەلتوقسانىندا سالالىق مينيسترلىك «Manka» تاۋ-كەن كومپانياسى» ج ش س-مەن قاتتى پايدالى قازبالاردى بارلاۋ جونىندە كەلىسىمشارت جاساسقان. ال 2025-جىلعى اقپاندا كاسىپورىنعا جەراستى ادىسىمەن التىن وندىرۋگە ليتسەنزيا بەرىلدى. كەن ورنىنداعى التىننىڭ بولجامدى قورى شامامەن 7 توننا دەپ باعالانعان.

ءوندىرىستى 2027-جىلى باستاۋ جوسپارلانعان. جوبا اياسىندا التىن ءوندىرۋ فابريكاسىن سالۋ كوزدەلگەن. وسى ماقساتتا كومپانيا «اك التىنالماس» ا ق-مەن قۇرىلىس-مونتاجداۋ جۇمىستارىنا، سونداي-اق ءبىرقاتار مەردىگەرمەن تەحنولوگيالىق جابدىقتار جەتكىزۋگە قاتىستى كەلىسىمشارتتار جاساسقان.

- بۇگىنگى تاڭدا فابريكا سالۋ جانە جابدىق جەتكىزۋ جونىندەگى جاسالعان كەلىسىمشارتتار ءىس جۇزىندە ورىندالا باستاعان جوق. اتالعان كەلىسىمدەر بويىنشا اۆانستىق تولەمدەر دە جۇرگىزىلمەگەن. شارتتىق مىندەتتەمەلەردى ورىنداۋعا ينۆەستيتسيالىق قارجى تۇسكەننەن كەيىن كىرىسۋ جوسپارلانىپ وتىر. جوبانىڭ نەگىزگى ينۆەستورى - تۇركيانىڭ Yildirim Holding كومپانياسى،-دەلىنگەن باسقارما مالىمەتىندە.

كاسىپورىنداردى تۇركيالىق حولدينگ 5 ميلليون ا ق ش دوللارىنا ساتىپ العاننان كەيىن وندىرىستىك مىندەتتەمەلەردىڭ ورىندالۋى ءىس جۇزىندە توقتاپ قالعان.

وندىرىستىك قۋاتتاردى دامىتۋعا تىكەلەي ينۆەستيتسيا سالۋدىڭ ورنىنا، كەن ءوندىرۋشى قۇرىلىمدارعا جىلدىق 25 پايىزدىق مولشەرلەمەمەن 21 ميلليون ا ق ش دوللارى كولەمىندە نەسيە بەرىلگەن. جوعارى پايىزدىق مولشەرلەمە كاسىپورىن ءۇشىن ءتيىمسىز قارجىلىق جاعداي قالىپتاستىرعان. سونىڭ سالدارىنان فابريكا سالىنباي، شاحتانىڭ ءۇش جىل بويى توقتاپ تۇرۋى كەن قازبالارىنىڭ جاعدايىن كۇرت ناشارلاتىپ، اپاتتى دەڭگەيگە جەتكىزگەن.

ءوندىرىستىڭ توقتاپ تۇرۋى بيۋدجەتكە تۇسەتىن سالىق تۇسىمدەرىنە دە اسەر ەتتى. 2021-2026-جىلدار ارالىعىندا كاسىپورىن بيۋدجەتكە جالپى سوماسى 358,6 ميلليون تەڭگە سالىق تولەگەن. الايدا سوڭعى جىلى تولەم كولەمى شامامەن 40 پايىزعا ازايىپ كەتتى.

كاسىپورىننىڭ وندىرىستىك بولىمشەسىنىڭ باسشىلىعى قۇقىق قورعاۋ ورگاندارى تاراپىنان قانداي دا ءبىر تالاپتار قويىلعانىنان حابارسىز ەكەنىن مالىمدەدى.

- ينۆەستور كومپانيا Yildirim Holding- ءتىڭ ىقتيمال قارجىلىق قيىندىقتارى، وعان قاتىستى قىلمىستىق تەرگەۋ جۇرگىزىلىپ جاتقانى تۋرالى كاسىپورىن باسشىلىعىندا مالىمەت جوق،- دەيدى «Manka» تاۋ-كەن كومپانياسى» ج ش س ديرەكتورى الەكساندر بابي.

ەندى تەرگەۋ ورگاندارى ستراتەگيالىق ماڭىزى بار كەن ورنىن يگەرۋ جونىندەگى كەلىسىمدەردىڭ نە سەبەپتى ورىندالماعانىن انىقتاپ، نەسيە بەرۋ كەزىندە قولدانىلعان قارجىلىق تەتىكتەردىڭ زاڭدىلىعىن تەكسەرۋى ءتيىس.

ەسكە سالساق، وسىعان دەيىن اباي وبلىسىندا التىندى زاڭسىز وندىرگەن توعىز ادام انىقتالعانى حابارلانعان.