ش ق و-دا كەلەسى جىلدان جانۋارلارعا قۇتىرۋعا قارسى جاپپاي ۆاكتسينا سالىنباق

وسكەمەن. KAZINFORM - شىعىس قازاقستان وبلىسىندا قۇتىرۋ اۋرۋىنىڭ الدىن الۋ ءتاسىلى وزگەرەدى. 2027 -جىلدان باستاپ ءوڭىردىڭ ءار اۋدانىندا ۆەتەرينارلار اۋرۋ وشاقتارى انىقتالعاننان كەيىن عانا ارەكەت ەتپەي، بارلىق ءۇي جانە اۋىل شارۋاشىلىعى جانۋارلارىن جاپپاي ۆاكتسيناتسيالاۋعا كوشەدى.

Россияда вакцинадан кейин 100 дан ортиқ ит нобуд бўлди
Фото: Kazinform/СИ

مۇنداي شەشىم جابايى اڭدار اراسىندا جۇرگىزىلگەن مونيتورينگ ناتيجەلەرىنە بايلانىستى قابىلدانعان. وڭىرلىك كوممۋنيكاتسيالار قىزمەتىندە وتكەن بريفينگتە شقو ۆەتەريناريا باسقارماسىنىڭ باسشىسى راميل ساعىندىقوۆ 2027 -جىلدان باستاپ ايماقتاعى بارلىق مالدى پروفيلاكتيكالىق ەكپەمەن قامتۋ جوسپارلانىپ وتىرعانىن مالىمدەدى.

بۇعان دەيىن وبلىستا ۆاكتسيناتسيا جۇمىستارى نەگىزىنەن اۋرۋ وشاعى انىقتالعاننان كەيىن جۇرگىزىلىپ كەلگەن، ياعني ءقاۋىپتى ينفەكتسيا تىركەلگەن جاعدايدا عانا مال مەن ءۇي جانۋارلارىنا جاپپاي ەكپە سالىناتىن. الايدا شەكارالاس اۋماقتارداعى ءتۇز تاعىلارى اراسىندا ينفەكتسيانىڭ تارالۋ ءقاۋپى الدىن الۋ شارالارىن كۇشەيتۋدى تالاپ ەتىپ وتىر.

- وبلىستىڭ شەكارالاس اۋداندارىندا جابايى جانۋارلارعا جۇرگىزىلگەن زەرتتەۋ ناتيجەسىندە قۇتىرۋ اۋرۋىنىڭ 10 جاعدايى زەرتحانالىق جولمەن راستالدى. بۇل پروفيلاكتيكالىق جۇمىستارعا ەرەكشە كوڭىل ءبولۋ قاجەتتىگىن كورسەتەدى. ءتۇز تاعىسى ءۇي نەمەسە اۋىل شارۋاشىلىعى جانۋارلارىنا جۇقتىرىپ ۇلگەرگەنشە كۇتپەي، الدىن الۋ شارالارىن قولعا الۋىمىز كەرەك، - دەدى راميل ساعىندىقوۆ.

مامانداردىڭ ايتۋىنشا، قۇتىرۋ - جانۋاردان ادامعا تىستەۋ نەمەسە سىلەكەيدىڭ جاراقاتتانعان تەرىگە ءتۇسۋى ارقىلى جۇعاتىن، اسا ءقاۋىپتى ءارى ولىمگە اكەلەتىن زوونوزدىق ينفەكتسيا.

اۋلالارداعى بارلىق جانۋاردى جوسپارلى تۇردە جاپپاي ۆاكتسيناتسيالاۋ جابايى تابيعات پەن ەلدى مەكەندەر اراسىنداعى ينفەكتسيانىڭ تارالۋىنا توسقاۋىل قويۋعا مۇمكىندىك بەرەدى. بۇل شارا شارۋا قوجالىقتارىن قورعاۋمەن قاتار، وبلىس تۇرعىندارىنىڭ دەنساۋلىعى مەن قاۋىپسىزدىگىن قامتاماسىز ەتۋگە باعىتتالعان.