دزيۋدوشىلارىمىزدى الدا قانداي ءىرى جارىستار كۇتىپ تۇر

قازاقستاندىق تاتامي شەبەرلەرىن جاڭا باستالعان جىلدا قانداي ءىرى دودالار كۇتىپ تۇرعانى بەلگىلى بولدى، دەپ حابارلايدى Kazinform.

ق ر دزيۋدو فەدەراتسياسى ءمالىم ەتكەندەي، 2024-جىلى دزيۋدودان الەمدىك گراند تۋرلار جالعاسىن تابادى. سول ارقىلى سپورتشىلار وليمپيادالىق رەيتينگىدەگى جاعدايىن ودان ءارى جاقسارتۋعا مۇمكىندىك الادى.

اتاپ ايتساق، حالىقارالىق دزيۋدو فەدەراتسياسىنىڭ كەستەسىنە سايكەس، 26-28- قاڭتار كۇندەرى پورتۋگاليادا گران-پري تۋرنيرى وتەدى.

2-4- اقپان ارالىعىندا پاريجدە «ۇلكەن دۋلىعا» حالىقارالىق تۋرنيرى مىقتىلاردى انىقتايدى.

ال 16-18- اقپاندا باكۋدە، 1-3- ناۋرىز كۇندەرى تاشكەنتتە، 22-24- ناۋرىزدا تبيليسيدە، 29-31- ناۋرىزدا انتالياداعى Grand Slam تۋرنيرلەرىنىڭ الاۋى تۇتانادى.

19-24- مامىر ارالىعىندا ابۋ-دابيدە ەرەسەكتەر اراسىنداعى الەم چەمپيوناتى وتەدى. سونداي-اق، 10-12- مامىردا Grand Slam تۋرنيرىن الماتى قالاسى قابىلدايدى.

وليمپيادا قارساڭىنداعى سوڭعى جارىس 28-30- ماۋسىم كۇندەرى ۇلان-باتور قالاسىندا وتپەك.

ال پاريجدەگى وليمپيادا ويىندارىندا دزيۋدو باعدارلاماسى 27- شىلدە مەن 2- تامىز ارالىعىنا جوسپارلانعان.

اۆتور كۇنسۇلتان وتارباي