ديماشقا قازاقستاننىڭ حالىق ءارتىسى اتاعى بەرىلەتىنى 1999 -جىلى ايتىلعان - ۆيدەو
پرەزيدەنتتىڭ جارلىعىمەن قازاقستاننىڭ حالىق ءارتىسى اتاعىن العان ايگىلى ءانشى ديماش قۇدايبەرگەن ينستاگرام پاراقشاسىندا ەلىمىزدىڭ ايتۋلى مەرەكەسى رەسپۋبليكا كۇنىمەن قۇتتىقتاپ، ارحيۆتىك بەينەجازبا جاريالاعان ەدى.
«ارداقتى الاش جۇرتى! بارلىق قۇتتىقتاۋ-تىلەكتەرىڭىزگە كوپ راقمەت! كەزىندە قونايەۆ دىنمۇحاممەد احمەت ۇلى: «مەن قانشا بيىككە كوتەرىلسەم دە، حالقىمنان بيىك ەمەسپىن»، دەپ حالقىمىزدى قانشالىقتى قۇرمەتتەيتىنىن كورسەتكەن ەدى. مەن دە ەل-جۇرتىمنىڭ اق پەيىلىنەن، ىستىق ىقىلاسىنان ارتىق بيىك قۇرمەت جوق دەر ەدىم. ونەرىمنىڭ ورلەۋى ەلدىڭ باتاسىنان ەكەنىن تەرەڭ ۇعىنامىن. «ەرىم» دەيتىن ەل باردا، «ەلىم» دەيتىن ەرلەر تۋادى. قاي مەملەكەتتە، قاي جەردە جۇرسەم دە ەلىمنىڭ ابىرويى بيىك بولسا ەكەن دەپ تىلەيمىن. قۇرمەتتى اعايىن، مەملەكەتىمىزدىڭ باستى مەرەكەسى «رەسپۋبليكا كۇنى» مەيرامىمەن بارشاڭىزدى قۇتتىقتايمىن!
سونىمەن بىرگە جاس بولسام دا بار نيەتىمەن قۇرمەت قىلىپ، ماراپاتتاپ جاتقان مەملەكەت باسشىسى قاسىم- جومارت كەمەل ۇلىنا شىن جۇرەكتەن العىس ايتقىم كەلەدى»، دەگەن قازاقستاننىڭ حالىق ءارتىسى ديماش قۇدايبەرگەن ارحيۆتىك بەينەجازبا جاريالادى.
وندا 1999 -جىلى 5 جاسىندا كوپشىلىكتىڭ الدىندا ءوزىنىڭ ونەرىن كورسەتكەن بالاقايعا كوپشىلىك ىقىلاسپەن قول سوعىپ جاتقانى بەينەلەنگەن.
سوندا جۇرگىزۋشى: «قۇرمەتتى كورەرمەندەر، 2030 -جىل دەپ ويلاڭىزداڭىزدار، ساحنادا ونەر كورسەتكەن قازاقستاننىڭ حالىق ءارتىسى ايتبايەۆ دىنمۇحامەد قانات ۇلى» دەپ تانىستىرادى.
ارادا 24 جىل وتكەندە ديماش قۇدايبەرگەنگە قازاقستاننىڭ حالىق ءارتىسى اتاعى بەرىلدى.
Посмотреть эту публикацию в Instagram
